Ka jingkular u Conrad Sangma ban ai kam haduh 5 lakh ngut ka dei tang ka kam pynbiej elekshon : Albert Maring

Nongpoh, Rymphang 12: Ka jingkular jong u Conrad K Sangma ban aikam haduh 5 lakh ngut khamtam ïaki samla ha ki 5 snem ban wan lada ka seng National People’s Party kan wan haka bor bad ioh biang ban thaw sorkar, haka jingïalang paidbah kaba la long ha Ampati ka dei tang ka buit ban jop elekshon ban pynbiej ïaki paidbah bala dei ka por elekshon, ong u Samla Albert Maring naka shnong Paham Dumu ha Ri-Bhoi.
“Kane ka dei tang ka jingpynthame bad thok im im peit peit ba ym don lad shuh ban kren da kumwei pat namar ba kine ki 5 snem bala dep ka sorkar hapoh ka jingïalam jong u Conrad K Sangma kam shym la lah ban pyndep ne pynurlong ïaki jingkular naka bynta ki paidbah ka jylla hi baroh kawei” la pynpaw u tei u samla haba phah ïaka kyrwoh, hynrei mynta pat sdang ban kular pynbiej ïaki paidbah da kaba pynmih kam bad aikam ïaki samla haduh 5 lakh ngut lada ka seng NPP kan ioh biang ban thaw sorkar.
Kaba sngew thamula ka long ba kumno ka sorkar jylla kan lah ban pynmih kam bad aikam ïaki samla haduh 5 lakh ngut haba tang ïa ki 8 hajar tylli ki kam ba lait bad kiba la don lypa ka sorkar jylla kam pat lah ban thungkam ban pyndap bad kiba dang sah thylli haduh mynta.
Kane ka dei tang ka buit pynbiej elekshon bala dei ka por ba ki paidbah kin jied pynthymmai ïaki nongmihkhmat kumjuh ruh ïaka sorkar ba ym don lad shuh da kumwei pat namar ka long kaba eh ban pynmih kam haduh 5 lakh ngut bad kane kala dei ka jingkular ha ri khlaw ba ki paidbah ki dei ban long kiba stad ban sngewthuh ym ban shah ïalam bakla.