Kylla ktem dih kyiad, jaka bret ñiut bad jaka leit paiñkhana ka jaka pynieng kali ha Nongpoh Shopping Complex

0

Nongpoh, Rymphang 12: Watla ka jingwan jong ka Nongpoh Shopping Complex kaba la ju tip paidbah ruh kum MUDA Complex ka la long shisha ka jingkyrkhu ïakiba bun ki paidbah jong ka thaiñ Nongpoh, hynrei haba rung sha katei ka building nalor ka jingbun ki dukan kiba shu khang khyrdep ka jaka bala buh kyrpang ban pynïeng kali ha khrum jong katei ka ïew kala kylla pynban kum ka ktem dih kyiad dih drok, ka jaka bret ñiut bad ka jaka leit paiñkhana bala isaitmet wat tang ban peit bad leit ïeng kali ha katei ka jaka.
Katto katne naki paidbah kiba ju leit ju wan lyngba katei ka jaka, kila phah ruh ïaki dur sha u nongthoh khubor namar ka jingisaitmet jong katei ka jaka kaba la long kum ka krem bad bun naki riew kynthei ki sheptieng wat ban leit ïeng kali sha katei ka jaka, bad wat ki riew paidbah namar ka ju don ruh ka jingshah tuh jong ki kali namar ka jingrieh tngen jong ki nongdih drok bad ki nongdih kyiad kaba pynlong pat ïaki surok ban khapngiah.
Kum ban shu pynpaw, kane ka Nongpoh Town Shopping Complex ka don haduh 3 mala bad ki don kumba 100 tylli ki dukan ha kawei kawei ka mala bad lada kheiñ lang baroh ki dukan (Stall) ki la don haduh 300 tylli, hynrei bun naki dukan ki shu khang khyrdep lait noh katto katne kiba plie thikna bad ha khrum jong katei ka building kala don ruh ka jaka pynïeng kali kaba la shu pynlong tang kum ka Dustbin ne ka jaka bret ñiut ka jaka leit paiñkhana jong ki paidbah kaba la mih ruh ka jingsma iwtung kaba shyrkhei kaba lah ban ktah wat ïaka koit ka khiah jong ki paidbah.
Namarkata naka liang ki bor ba dei peit kila dei ban shimkhia ban weng ïa katei ka jingsma iwtung, ban pynkhuid ïaki jaboh jabaiñ bad khamtam ban wanrah jingshngaiñ naka bynta ki paidbah ba katei ka jaka ieng kali kan long kaba ïaid beit ïaid ryntih ban lait ruh naka jingkhapngiah ka sor Nongpoh naka bynta ka jingmyntoi ki paidbah.

Leave A Reply

Your email address will not be published.