Mawkyrwat, Rymphang 05 : Ka Federation of Khasi Jaiñtia & Garo People (FKJGP) jong ka South West Khasi Hills District, ka la leit jngoh ryngkat ka jingnoh synñiang da ki marbam mardih bad ka song pisa ïa kawei longïing ha ka shnong Tynnai, South West Khasi Hills District kaba donkam eh ïa ka jingïarap hadien ba ka ïing jong ki bad ki jingdon jingem baroh ki shah bam duh lut ha ka ding.
Lah ban kdew ba jingjia shah bam duh jong ka ïing jong ka kong Badaphylla Jyrwa bad u bah Famous Syiemlieh kiba don ar ngut ki khun, iwei iba 2 snem tam bad iwei iba dang saw bnai ka dei ha ka 18 tarik u Kyllalyngkot, 2025.
Kumta ka FKJGP hapoh ka jingïalam u bah Kenesjune L. Nonglait, President ki la leit ban noh jingïarap ha ryngkat ka jingsynrang ki nongkitkam bad ki para dkhot ka seng.
U bah Kenesjune L. Nonglait haba ai jingkren ha katei ka sngi, u khot u wer ruh ïa baroh kiba don mynsiem ban noh jingïarap la ka long na ki paidbah, ki sengbhalang bad ki ‘riew shimet kat kiba ïohi lyngba ki lad pathai khubor halor kane ka jingjia bad ym tang kata kiba don ïa don ka mynsiem ïarap lem ba kin leit ban ai jingiïarap lem ïa katei ka longïing.
Ha kajuh ka por u bah Kenesjune u la buh ruh ka jingkyrpad ïa ki bor distrik ba kin ïa peit lem da kaba kin leit ai jingïarap ïa katei ka longïing kaba donkam shisha ïa ka jiingiarap kum ha kane ka por.
