Nongstoiñ, Nailur, 01: Ka seng National People’s Party Nongstoiñ mynta ka sngi ka la leit ban jngoh kyrpang ïa ki 2 tylli ki jaka sumar khunswet lane Children’s Home kiba don ha sor Nongstoiñ.
Ka jingleit jngoh ka long kum shi bynta ban kynmaw burom ïa u synñiang u bynhei jong u late P.A. Sangma, u ba la bet myn ha ki por ba u dang don ha ka sla pyrthei. Ha kajuh ka por ka dei ruh ban kynmaw burom ïa ka lyngkhuh sngi kha kaba 76 jong u, u ba dei ruh u nongseng jong ka Party NPP kpa jong u Conrad K.Sangma Myntri Rangbah ka Jylla Meghalaya.
Ka party NPP ka la pyndon burom ruh ïa kane ka sngi kum ka sngi ka jingkynjoh 11 snem ka National People Party lane ka Foundation Day, naduh ba la seng ïa ka da u Late PA Sangma. La ong ruh ba utei u riew khraw ka jylla u dei ruh u ba wan na ka longïing khunswet kumta la kynmaw kyrpang ïa kitei ki khynnah.
Ka seng ka la phiah ar kynhun, kata kawei ka la leit ban jngoh ïa kiba sah ha Green Pasture Children’s Home kaba don ha ka shnong Tiehsaw, Nongstoiñ katba kawei pat ka la leit ban jngoh ïa kiba don ha Rev S.Wollington Children’s Home kaba don ha shnong Mawkhlam Nongpyndeng.
Ha kane ka sngi la ïadonlang u bah P.S.Marweiñ Vice president ka NPP Nongstoiñ, u samla Mickey Marweiñ working president NPYF Nongstoiñ Block, kong Adoreen Marbaniang Superintendent Green Pasture Children’s Home bad After Care Girls Home Tiehsaw u Pastor Ïarlin Dura bad la pynïaid ïa katei ka jingïalang da u tymmen basan Dr. M. Tongper.
