Nongstoiñ, Nailur, 01: Namar ka jingsniew palat jong ka surok naduh shnong Diengsyiang, ki paitbah nongshong shnong katei ka thaiñ ki la pynpaw ka jingsngewkhia kaba jur, namar haba ki leit kai sngewbha ne leit don kam sha Nongkhnum, ki hap ban kiew arted shuwa sha shnong Lawse bad ki sa hiar sha Nongkhnum.
U Bah Shainingstar Myrthong sordar shnong Dilingim haba pyntip ha u nongthoh khubor mynta ka sngi, u la ong ba ha kine ki sngi ki kali kiba mut ban leit sha Nongkhnum, Dilingim bad kiwei kiwei ki shnong, ki la shem jingeh bha ban ïaid na katei ka surok bad wat ki trok ruh ki la jynjar haduh katta katta ban ïaid.
U Bah Myrthong u la ong ruh ba ha ka jingshisha ka sorkar ka la dei ban shimkhia ban pynbha bad siang rong ïa ki surok ki ban pynpoi sha ka dewlynnong Nongkhnum, khnang ba ki nongwan shangkai suwari kin bun bha bad kan long ka jingmyntoi ym tang ïa ka sorkar hynrei kan kyntiew ruh ïa ka ïoh ka kot jong ki paitbah nongshong shnong ha katei ka thaiñ.
Haba phai sha ka surok ban leit sha Nongkhnum naduh lad Mawkyrwat haduh ban da poi ha katei ka dewlynnong kaba dei ka jaka jngoh kai, kam long kaba biang satia namar ba haduh mynta u kontraktor u ba pynbha bad siang rong ïa katei ka surok, um pat lah ban pyndep lut ha kaba ki dang don ki bynta kiba dang khohruh khohram.
Utei u nongïalam shnong u la ong ruh ba lada phai ha ki jingpynlut pynsep jong ka sorkar ha kaba shna ïa ki jaka sah jong ki ba wan shangkai suwari, ka jingpynlut pynsep ha kiba bun ki bynta, ki shu long tang ban pynmyntoi ïano re, namar ba lada ka surok kam biang kam don jingmut ban pynitynnad ïa kitei ki jaka sah bad ki jaka jngoh kai kum ka Shadthum bad kiwei kiwei ki bynta.
Nalor kata u la ong ba ha kine ki ar snem mynta ki nongshang suwari ha ka dewlynnong Nongkhnum ki dei tang kito ki bym pat tip ïa ka jinglong jingman jong ka surok. Hynrei kiba bun ba lang kiba la tip ba ka surok ka long kaba sniew kim treh shuh ban wan kai ha katei ka Dewlynnong.
