Shillong, Nailur, 01: U MP ka Rajya Sabha u Dr. WR Kharlukhi uba long ruh u State President ka NPP ha ka sngi Thohdieng u la buh jingkylli ïa ka National Green Tribunal (NGT) halor ka jingpynjari ïa ka jingkhang tih dewïong ha kane ka jylla Meghalaya hynrei kam shym la lah ban leh eiei halor ka jingjaboh ka lyer ha Delhi.
“Ngi ïoh ïa ka jingjaboh ha Delhi. Ka NGT ruh ka don ha Delhi. Nga la buh ka jingkylli, kam dei tang halor ka jingsaphriang ki khñiang jingpang, ka don jingïadei ruh bad ka ïap ka im. Ngam kren ïa ka shaphang ki dohum ne ki mrad. Nga kren shapang ki birew balei ym shym la lah ban leh eiei. Dei ban leh eiei hangtei ruh bad ka NGT ruh ka don ha Delhi,” ong u Dr. Kharlukhi ha ka jingïakren bad ki lad pathai khubor.
U Dr. Kharlukhi u la ong, “ngan ym ong daleilei ruh ba ki (NGT bad Supreme Court) bakla (ba la khang ïa ka jingtih dewiong ha Meghalaya) hynrei kaei kaba nga ong ka long haoid phi la leh eiei hangne bad phi dei ruh ban leh eiei hangtei.”
Da kaba pynpaw ba ka pynmong ïa u ban ïohi haduh katno ki briew ki mad ïa ka jingsuhsat naduh ba la khang tih dewiong, u Dr. Kharlukhi u la ong, “kane kam dei ka nongrim ba ka Sorkar ka ieng hynrei ka dei ka nongrim jong nga…..u dewiong na ka bynta ki briew jong ngi ha Rilum Jaiñtia u long kum ka pliangja. La pruiddak kum ka hok bad ka jingbym shah ban tih dewiong na ka bynta ki briew jong nga na ka distrik jong nga ïa kaba ngi la trei da ki sawphew snem tam ka long kumba kyntait ban ai bam ïa ki briew jong ngi.”
“Nga kyrshan borabor ïa ka jingtih dewiong. Phi lei eiei tangba ki briew jong nga kim dei pat ban ïap thngan,” u la ong.
U la ïathuh ba u la pyrshang ban rah ïa kane ka mat hapoh ka Parliament hynrei um shym la ïoh ka lad wat haba ladep ai jingthoh la ar sien kynthih.
“Nga la pyrshang ban pyni kaei kaba phi leh hangne, (khang tih dewiong ha Meghalaya) balei pat ym shym la leh hangtei (Delhi) ruh. Kam mut ba ngi don shajngai, phi lah ban leh katba phi sngewbit ïa ngi,” u la bynrap.
U la bynrap ruh, tang shu pynsdang ban ailad ban tih dewiong katkum ka juk stad saïan, ka jingtih dewiong kam dei shuh ban sangeh lano lano ruh.
Katkum ka jingong jong u, ka jingtih dewiong kan ym pynmyntoi tang ïa ki paidbah hynrei kan kyntiew ruh wat ïa ka jingïoh lum khajna jong ka Jylla ha kaba baroh ki nongshong shnong kin ïoh jingmyntoi.
