Jowai, Naiwieng, 04: Ka Pnar Student Movement (PSM) Central Body hapoh ka jingïalam u President Rangbah u Embhah Passah bad u General Secretary u Wompher Wann ha ryngkat ki dkhot, ha kane ka 3.11.2025 ki la leit ban buddien biang ïa ka Notification Notice ba la pynmih da ka MCH Hospital Jowai. Katkum ka No.MCH/Hosp/WJH/MHIS-PMJAY/HR/24-25/3242, Dated: Jowai 6/11/2024 naka bynta ki 9 tylli ki post Grade-IV bad 4 tylli ki post PMAM/DEO.
Na ka liang ka seng ka la dep ban leit ïa kynduh ban pan jingshai naka DMHO bad kumjuh naka Medical Superintendent ka MCH Jowai ha ka 9.07.2025 ha kaba ïadei bad ka jingslem ban khot Written bad Interview na ka bynta kitei ki post.
Ka seng la ong kitei ki ophisar haduh mynta kim lah ban ai jingpynshai ha kaba ïadei bad kitei ki kam, ha kaba ka seng ka la ap jubab da ki bun bun bnai mynta, hynrei hynnin ka sngi ka seng kam banse ban leit ïa kynduh ha ryngkat ka jingthoh ha u DC ka West Jaiñtia Hills District ban ïoh jingtip, hynrei namar jingbym don u DC ka seng ka la leit kynduh ïa ka Additional DC ka kong B.Blah ban ïakren halor ka jingbym ïoh jingshai na kitei ki ophisar.
Kitei ki nongïalam ka seng ki la pynsngew sa 3 sngi mynta kane ka jingdawa kaba kynjoh sha ka shisnem naduh ba la pynmih Notification Notice ka MCH Hospital bad kiba bun ki khun samla ki la dep ban apply ïa kitei ki kam, kane ka jingpynslem ka la buh jingmut ïa ka seng ba ka lah ban don kaei re kaei sha lyndet.
Ka seng ka la kyntu ïa ka Additional DC kong Blah ba kan ïarap ban shimkhia ïa katei ka kam na ka bynta ka jingmyntoi jong ki khun samla ka thaiñ, na ka liang ka kong Blah ruh ka la kular ha ki nongïalam ka seng ban ïakren ïa kane bad u DC ban pynkloi ïa ka kam khnang ba ki nongïakhun ïa kitei ki kam ruh ki ïoh jingshai, la pynkut ka kytwoh na u Publicity Secretary ka PSM samla E.Suchiang.
