Nongstoiñ, Naiwieng 04: U District Magistrate ka West Khasi Hills District, u bah Garod L.S.N. Dykes u la pynmih ïa ka hukum katkum ka kyndon 163 jong ka Bharatiya Nagarik Suraksha Sanhita (BNSS) 2023, kaba khang pyrshah ïa ka jingïaid jong ki kali heavy loaded multi-axle bad ki kali kit palat pud halor ka jingkieng No. 10/1, Risiang, surok Nongstoiñ-Darugiri (Nongstoiñ-Risiang 9+436 Km).
Kane ka hukum ka long hadien ka jingkyrpad na u Executive Engineer, P.W.D. (Roads) Nongstoiñ Division, hadien ba la lap ba katei ka jingkieng namar ba ka la slem bad rim bad ka la tlot bor, kam ishngaiñ shuh lada kit jubor palat pud.
Ïa kane ka jingkhang la buh kum ka lad jingïada na ka jingpynjot shuh shuh ïa kane ka jingkieng bad ban pynthikna ïa ka jingshngaiñ jong baroh ki nongleit nongwan bad ki nongpyndonkam lyngba katei ka jingkieng.
U District Magistrate u la ban jur ba kine ki jingkhang ki long kiba donkam ban ïada ïa ka jingshngaiñ jong ki paidbah, ban ïada na kino kino ki jingjia ba sngewsih kiba lah ban mih lada yn ailad ïa ki kali kiba kit palat pud ban ïaid na katei ka jingkieng kaba la tlot bor.
Kino kino kiba pynkheiñ ïa kane ka hukum, lada lap kin shah pynngat ha ki kyndon aiñ 223 jong ka Bharatiya Nyaya Sanhita (BNS), 2023.
Namar ka jinglong kyrkieh bad kaba donkam eh jong kane ka kam, la pynmih ïa kane ka hukum ex-parte bad kan dang treikam haduh ban da pynbna da kumwei pat.
