Shillong, Naiwieng 4: Ka Sorkar Jylla kala mang 45 Klur tyngka ban shna pynbha ïa ki surok kiba kongsan hapoh Shillong, ban mih bujli noh ha ka jaka jong ki Smart Road Project.
ïa kane la pyntip da u Symbud Myntri Rangbah uba khmih ia ka tnad Transport u Ma Sniawbhalang Dhar hynne ka sngi Baar.
ïa ka kam la khmih lynti ba dei ban pyndep hapoh ka samoi treikam jong u snem, da ka jingthmu ban pynbha ïa ki jingtei ha sor, la ong u Ma Sniawbha haba ïakren bad ki nongthoh khubor.
U Symbud Myntri Rangbah ula batai ïa ki sienjam ban pynbha ïa ka leit ka wan jong ki paidbah da kaba pynleit jingmut ha ka ban pynduna ïa ka jingdheng kali.
U Ma Sniawbha ula kubur ruh ïa ka jingeh kaba mih na ka jingdheng kali bad ula ong ba dei namar kane, ka sorkar kan tei ïa ki Parking Lot ne jaka pynïeng kali ha kylleng ki jaka kum ka jingpyrshang ban thaw lad kumno ban pynduna ia kane ka jingeh ki paidbah.Ula pyntip ruh ba ka sorkar ka don ïa ka jingthmu ban pynkynriah ïa ki ophis treikam sha ka New Shillong Township.
“Kumta hapoh jong ka 5-6 snem, ka New Township ka dei ban don ha ka lynti kaba long ryntih bad kiba bun ki ophis kiba rim yn sa pynkynriah noh bad kumta ka jingdheng kali kan sa kham duna noh (ha nongbah Shillong barim)” ong Ma Sniawbha.
ïa mynta shipor, la sorkar ka dang wad ïa ki lad ki lynti ban pyntreikamïia ka One Way Traffic System da kaba ïasyllok bad ki rangbah shnong.
Nalor kane, u Symbud Myntri Rangbah ula kubur ruh ban pynbeit ïa ka jingdheng kali ka dei kaba kynthup ïa kiba bun ki tnad kynthup naduh ka tnad Transport, Kam Pohïing, Pulit, bor pynïaid district bad ula pynthikna ba ka sorkar ka dang trei ha ka ban shimkhia ïa kane ka jingtynjuh.
