Nongstoiñ, Naiwieng, 04: Ka jinghap slap ha kane ka taïew ba la dep ha kaba ki nongrep ki la sdang ban ot ïa u kba ha ki pynthor, ka la pynsngew diaw khamtam ha kito ki jaka ba u slap u kham jur, namar u kba ba la dep ot u bym pat lum thup u la jhieh lut bad don ruh ki jaka kiba u kba u la per ha sla um.
Watla naduh kane ka lah sngi u Blei kaba dei ka 3 tarik Naiwieng, ka suiñ bneng ka la sdang ban khuid bad shit kyrang ruh, hynrei ki nongrep ki dang sngew syier ban ot ïa u kba namar kim pat ha ka por janmiet ka suiñ bneng kam pat da ithikna satia.
U bah T. Marweiñ uwei na ki nongrep kba ha ki thaiñ Umyiap, u la ong ba naduh kane ka sngi hat majai, bun na ki nongrep ki la hiar sha ki pynthor kba ryngkat ki rashi ban ot ïa u kba, ha kaba don ki nongrep kiba ki kynthei ki nang ot, ki shynrang pat ki nang lum, khnang ba lada jia ba u slap u hap biang kin lah ban tap bad ban ïada na ka jingjhieh.
Haba phai ha ka jinglong jingman jong u kba ha une u snem, u la ong ba haba peit ïa u jyntang bad u soh ha man la ki pynthor kba la itynnad shisha, namar u slap u biang bad ka mariang ruh ka long jai jai bha bad kam shym don ka lyer kaba beh kyrthep, naduh ba u kba u dang sdang ban syntiew tangba ym pat lah ban pynthikna namar ym pat dep ban lum bad pynpoi sha ïing.
U la ong ba ki dang don ruh shibun ki lyngkha kiba ki nongrep ki dang hap ban ap sa kumba shi taïew tam ei ei haduh ba un da long ban ot. Lada u slap um hap shuh kan long ka jingkyrkhu kaba khraw ïa ki, hynrei lada jia ba ka mariang ka kylla da kumwei pat ka jingduh jong ki nongrep ka long kaba khraw.
