Shillong, Jymmang 25 : Ki Saiantis na Guwahati University, Lady Keane College bad ICAR- National Bureau of Dish Genetic Resources, Lucknow ha ka jingwad bniah jongki ïa ki jait dohkha kiba im hapoh ki krem ki kroh ki la lap dang shen ïa ki jait symbai dohkha ba thymmai kiba im hapoh ka Krem Mawjymbuiñ, ka krem kaba jngai tang kumba 15 Km na Mawsynram. ïa kine ki jait dohkha la jer kyrteng kum ki Schistura Densiclava.
Wat la kane ka krem ka kham jngai bad hap ban ïaid da ka kjat hynrei kine ki Saiantis kiba wad bniah na kitei ki skul bah ki la rung sha katei ka krem. “ Kane ka jinglap ïa kine ki jait dohkha ba thymmai ka pynpaw ïa ka jingriewspah ki jait jingthaw kiba im hapoh ki um bad krem ha Meghalaya, ong u Professor Dandadhar Sarma,u Head ka Zoology Department ka Guwahati University. Kine ki dei ki jait dohkha ba phylla kiba 9 jait ba la lap ha kane ka thaiñ shatei lam mihngi bad ki dei ki jait dohkha kiba hynriew jait kiba la lap tang na ki krem hapoh ka Meghalaya.
Kiba bun ki dohkha kiba im hapoh ki krem ki dei kiba matlah hynrei kine ki jait dohkha pat ki lah ban ïohi. Ki rong jong ki ki long jyrngam stem bad thoh laiñ ïong ruh.
ïa ka jinglap ïa kine ki jait dohkha ba thymmai la pynmih ruh ha ka Journal of Fish Biology, ka magazine jong ki Fisheries Society, British Isles.
