Bun ki lait na tyrsim ki jingma ba tuklar ka KSU Delhi, ai jingïaroh u Dy CM

Shillong, Jymmang 25 : U Symbud Myntri Rangbah ka Jylla, Bah Prestone Tynsong u la ai ka jingïaroh ïa ka KSU Delhi kaba la ïoh ban pyllait bun ngut bha ki nong Meghalaya na ki tyrsim jong ki riewsniew ha nongbah Delhi.
Haba kren ha ka prokram ïakob Mr bad Ms Hynñiewtrep kaba la pynlong da ka KSU Delhi Unit ha Meghalaya House, Dr. APJ Abdul Kalam Road ha ka janmiet sngi Saitjaiñ, u Symbud Myntri Rangbah u la ong, “Phi la ïohsngew ba bun ki paidbah ba lui lui kiba wan na jngai ban wad kam hynrei kaba sngewsih ki poi pynban sha ki jaka bym dei. Hynrei bun ngut na kine ki ïoh ïa ka jingïarap bad ka jingïada na kane ka Unit.”
Ha kawei pat ka liang, u Symbud Myntri Rangbah u la ong ba ki kyrmen ba ka KSU hapoh ka jingïalam jong u President Rangbah, Bah Lambokstarwell Marngar kan nang lah ban pynïar ïa ki thapniang ki jongka ha kiwei kiwei ki jylla jong ka ri. Ha kajuh ka por u la ïaroh ruh ïa ki nongïalam jong ka KSU Delhi Unit kiba la lah ban bteng ïa ka jingshakri ba khlem shongthait ban ïarap ïa ki nong Meghalaya kiba wan pule bad wan trei ha ka nongbah jong ka Ri.
“Wat ym artatien, hynrei pyntip ne phone sha u Myntri Rangbah lane sha Symbud Myntri Rangbah namar ngi don ban shakri ïa ki nongshong shnong ha Meghalaya bad wat ïa kito kiba don shabar ka jylla ruh,” u la bynrap biang.
Na ka liang u Bah Prestone u la pyntip ruh ba shen ka sorkar Jylla kan sa phah shna pynheh noh ïa ka Meghalaya House kaba don ha Delhi khnang ban ïoh pynlong ïa ki prokram ba kham heh. U la pyntip ruh ba shen u Myntri Rangbah un sa buh ïa u mawnongrim na ka bynta kane.
U Symbud Myntri Rangbah u la kyntu ruh ïa ki nongshong shnong ka Meghalaya kiba sah ha Delhi ba kidei ban ïa kren ïa khana khnang ban wanrah shuh shuh ka jingïajan ym ba kin leh kumba kim ithuh haba ki kynduh sharum shaneng ne ha kino kino ki jaka.
Da kaba pynpaw ba um lah shah satia ïa ka lyer pyngad ba shna u briew (AC) ba ki pyndonkam ha katei ka janmiet, u Symbud Myntri Rangbah u la kyntu ïa ki paidbah ba ki dei ban wan mad ïa ka lyer khuid ba ka jylla ka don la ka long ha rilum Garo bad kumjuh ha rilum Khasi – Jaiñtia.