Jowai, Nailur, 01: Ki dkhot jong ka Synjuk Waheh Chnong Jowai (SWCJ), ba la lamkhmat da u President u Ma Alan Niangti, u General Secretary u Ma Riquoma Rq. Laloo ha ka sngi Thohdieng ki la leit jurip ïa ka Maternal & Child Health (MCH) Hospital kaba don ha Panaliar, Jowai, West Jaiñtia Hills District, hadien ka jingïoh ujor na kiba bun ki paidbah halor ki jingeh kiba ki ïakynduh na ka daw jong ka jingduna trikam jong kane ka Hospital.
Ha kane ka sngi, ka Synjuk ka la ïakynduh ïa u Medical Superintendent (MS) jong kane ka Hospital u Dr. E. War ha ryngkat ka jingdonlang kiwei de ki doktor ban ïoh jingtip ïa ki jingduna kane ka jaka ai jingsumar sorkar.
Na ka liang jong u Medical Superintendentu la pynpaw ïa shibun ki jingduna ba kane ka jaka ai jingsumar ka ïakynduh, naduh ka jingduna jong ki Doctor, ki Nurse, ki nongtrei Grade IV bad kiwei kiwei.
U la pynpaw ruh ba kum u nongpeit ïa kane ka jaka sumar u shem jingeh shibun namar kane ka jingduna ha kiba bun ki liang.
Kumta u la kyntu ïa ka Synjuk ban shimkhia lang khnang ban wad ki lad ki lynti halor kane ka jingeh kaba ka Hospital ka ïakynduh.
