Shillong, Nailur 01 : U MP Rajya Sabha ka NPP bad President ka party ha ka Jylla u Dr WR Kharlukhi ha ka sngi Thohdieng ula ïathuh ba ka party jong u ka buhthong ban jop 15-20 seat na ki jylla ka thaiñ Shatei Lam Mihngi ha ka elekshon Lok Sabha ban wan.
“Hooid, ngin pyrshang ban sei kyrtong na baroh ki Jylla ka thaiñ. Lada ka NPP ka lah ban jop ha baroh kawei ka thaiñ, kaba ngi la antad bad buhthong 15-20 ngut, ka sur jong ngi ruh kan sawa jam ha Parliament. Lada kam long, kan long thik kum ka kam u Vice Chancellor, ka kam u Director ka NEIGRIHMS ha kaba yn ym don mano mano ruh ban sangap ïa ngi” ong u Dr Kharlukhi.
Haba pynpaw ba ka NPP ka ïeng kum ka seng saiñ pyrthei na ka bynta ka thaiñ Shatei Lam Mihngi, ula ong “Ban pynurlong ïa kane, ngi hap ban ïoh ïa kata lem kumta yn ym don ba sngap ïa ngi ha Delhi. Tang uwei ne arngut ki MP ba ïaid la la ka jong, yn ym don ba sngap satia ïa ngi. Phi ïohi ïa kaei kaba jia ha Manipur, ym don mano ano ruh ba ïakren halor ka Manipur namar ngi ïaid la ka jong. Lada ngi don kawei ka sur na ka thaiñ, ban phah 20-21 ngut ki MP, kan jin da pher bha. Lada ka NE hi ka ïapait ïapra, ngi hap ban shu klet noh ïa kiei kiei baroh”.
Haba kren halor ka kam jong u Vice Chancellor ka NEHU, u Dr Kharlukhi ula ong “Ngi la ïakynduh bad la thoh ruh wat sha u Myntri ba dei khmih hynrei tang ïa ine I kam ba rit, ym don ba pynsngap ïa ngi. Ta ka daw nga ong ba lada ka NE ka kwah ban long ka bor ba khlaiñ ha ka kam saiñ pyrthei ha Delhi, ngin hap ban phah ïa ka kynhun ba don bor, ka party naka thaiñ kaba don kumba 15-16 ngut ki MP bad hangta kin sa sngap ïa ngi”.
Ula ong ba ka Sorkar Meghalaya ka la mynjur ïa ka resolution ban pynrung ïa ka ktien Khasi ha ka khyrnit ba phra bad ban pyntreikam ïa ka Inner Line Permit (ILP) hynrei ka Sorkar Pdeng kam shym la leh eiei. “Na kata ka daw lada ngi dang ïapait ïapra hi, ngi hap ban klet ïa kiei kiei baroh” ula ong.
