Khliehriat, Nailar, 27: Ki nongïalam bad ki dkhot jong ka Khasi Students Union Huroi Unit ha ka jingleit jurip ïa ka Sub Centre ha shnong Huroi, myn ha kine ki khyndiat sngi ba la leit, ki la lap ba dang don shibun kiba dang duna hapoh katei ka centre ai jingsumar kaba don ruh ha ka thaiñ ba khappud bad ka ri Bangladesh
Haba ki dkhot ka seng ki la ioh ban ïakren bad ki nongtrei jong katei ka Sub Centre, ki la ioh jingtip ba wat tang ka um kaba dei ka jingdonkam ba kongsan kaba hakhmat eh ruh kam don ha katei ka Sub Centre, nalor kata ka don ka jingduna ha ka bor ding, ki jaka thiah ban pynkha khyllung ruh ym pat don satia, ki jaka ban pynthiah ïa ki khyllung kiba dang shu dep kha ruh ym don
“Haba ka KSU Huroi ka la iohi bad sakhi da la ki khmat ïa kine ki jingduna kiba don hapoh kane ka sub-centre, ka seng ka dap da ka jing sngewpang nud haduh kata katta” ong u kyrwoh bad ka seng ka kynthoh jur ruh ba kane baroh ka paw ba ka dei ka jingshah lehbeiñ ki paitbah ka thaiñ khappud ka la long shaba palat bad ruh ka paw shynna ka jingshah ieh beiñ khamtam kito ki longkmie ki ba armet kiba kha khyllung bad kumjuh ruh ki paidbah ki ba pang ba shitom.
“Kaba pynlyngngoh shuh shuh ïa ka seng, ka long ba ha kane ka Sub-Center ym don ruh wat tang ki dawai na bynta ki paidbah jong ka shnong bad ka thaiñ ba kin dih haba wan lap ka pang ka shitom bad ki paidbah kiba ju iathuh ruh ba ym ju don bad ym ju ioh dawai na katei ka sub centre haba ki leit ban wad dawai, kane ka pyni shisha ïa ka jingleh beiñ jong ka sorkar ïa ki paidbah ba shong ba sah ha khappud Bangladesh”
Hadien ba ka seng ka la lap bad sakhi ïa ki jingduna baroh, ka seng ka dawa jur na ka bor District jong ka East Jaiñtia Hills District bad kumjuh ruh na ka nongmihkhmat ka thaiñ, kaba dei ka MLA jong ka 5-Sutnga Saipung constituency, ka kong Santa Mary shylla bad khamtam eh ïa ka sorkar jylla, ba ki dei ban shimkhia lem halor kine ki jingeh ba ki paidbah ki ïakynduh khamtam ha kum kane ka por ba dei ka aiom slap ha kaba ki briew ka thaiñ ki pang ki shitom ki kynduh jingeh bad ki shitom jingmut ruh bad ki don ruh bunsiem ha ka kut lad namar ka jingbym don ki kali ïew kiba iaid ha ka thaiñ khappud, namar ki kali kim lait ban iaid na ka daw ka jingsniew palat ka Surok na Huroi ban poi shaduh surok national highway Sonapur.
“Balei ka jingshah lehbeiñ ka jingshah ieh beiñ ki paidbah kiba sah ha khappud bad ka Bangladesh ka dang ïai bteng haduh kine ki sngi? buh jingkylli ka KSU Huroi Unit ïa ka sorkar jylla halor kane ka jingeh ki paidbah khappud ki iakynduh” pynkut u kyrwoh na ka seng.
