Syrtok ki paidbah ka Raid Madan naba sniew palat ka surok na Bhoirymbong sha Kyrdem

Nongpoh, Nailar, 27: Ka jingsniew palat ka surok na Bhoirymbong sha Kyrdem kaba don kumba 9 km ka jingjngai ka la pynsyrtok shisha ïa ki paidbah ha ka leit ka wan bad na ka daw ka jingsniew jong katei ka surok ka la wan rah ka jingduhnong kaba khraw ïa baroh ki paidbah kiba hap ban pyndonkam ïa katei ka surok na ka bynta ka leit ka wan.
Kum ban pynpaw kane ka surok ka dei ka surok PWD ha kaba ka dei ruh kawei na ka surok kaba donkam bha na ka bynta ki paidbah bad da ki phew tylli ki shnong ki pyndonkam ïa kane ka surok ban ïaid ban ieng bad na ka bynta ki jingdonkam bapher bapher lyngba kane ka surok.
Kiba bun ki riew paidbah ki la ju pynpaw jingeh na ka por sha ka por bad khatam ki Kali kamai ki shem jingeh ban ïaid na kane ka Kali, namar ka jingsniew ka surok ka la long shaba palat liam.
Kumba la lap bad sakhi ruh ka jingsniew kane ka surok ka la long ha baroh shi lynter naduh na Bhoirymbong ter ter shaduh ka Shnong Kyrdem bad haba phai ruh ïa kiwei ki bynta jong ka surok kumba pynïasoh na Nongthymmai sha Mawbeiñ bad ka surok na Kyrdem sha Khyndewso ruh ka dei ka surok kaba la donkam ban maramot bad ban pynbha, hynrei kumba long haduh mynta ka sorkar jylla lyngba ka tnad PWD kam shym la lah satia ban maramot ne pynbha ïa kine ki surok paidbah.
Kaei kaba sngewkhia halor ka jingsniew jong kane ka surok, ka dei ha ka pang ka shitom bad wat ki longkmie kiba armet la shem jingjynjar ban ïaid na kane ka surok ha kaba ka sniew ka surok ka la long kumba ïaid Kali kulai namar ha shi lynter ka surok la dap tang da ki thliew ki syar suda ha kaba ka rong kaba la siang ka la khoh ban jot rathai.
Kum ban pynkynmaw, ha ki snem ba la leit noh na ka liang ka Raid Madan Kyrdem ryngkat ki paidbah ruh ki la dep ba maramot ïa kane ka surok shi bynta ban pynsuk ïa ki paidbah ha ka leit ka wan, hynrei kane kam shym la neh slem bad namar ba ym lah ban siang da ka rong kane ka surok ka la jot biang bad ka la kylla long kum ka surok khyndew ne ka surok maw.
Halor kane ka jingsniew kane ka surok ka la ktah ïaki paidbah ha baroh ki liang, ha kaba ka surok na Bhoirymbong kaba dei ban poi tang da ki 15-20 minit ban poi sha Bhoirymbong bad namar ka jingsniew ka surok ka la shim por da ki kynta bad kane ka la dei kawei na ka jingeh kaba khraw ha kaba baroh ki paidbah ki la shu khñium beit haba ïaid lyngba kane ka surok.
Kiba bun ki riew paidbah ruh wat la kim shym la lah ban pynpaw ïa ka sur sha ka sorkar ne ka tnad PWD bad ka jingangnud jong ki, ka long ba ka sorkar lyngba ka tnad PWD kan shim khia noh ban pynbha ïa kane ka surok, namar ïa kane ka surok la pyndonkam ban ïaid da ki paidbah ha ka leit ka wan, ki khynnah skul bad wat kiba pang ba shitom bad ka jingsniew palat kane ka surok ka la buh jingeh ïa ki paidbah ha baroh ki liang.