Shillong, K’Lyngkot 07 : Ki khynnah rit ka Don Bosco Soccer Academy, ki la ïoh ba kin rah ïa ka nam lahduh ha ka lympung ïalehkai (L) Josephine Kharkongor U-13 Memorial Football Tournament hadien ba ki la pynliem noh ïa ka Josephine Kharkongor FC da 2-1 kol ha ka phainal ba la long mynta ka sngi Ba-ar ha madan ïalehkai jong ka Rangdajied United FC Performance Centre.
Ïa kine ki artylli ki kol, ki khynnah rit ka Don Bosco la ïoh ba kin thep ha baroh ki ar kylla jong ka jingïakhun, katba ka shi kol jong ka JKFC ka la ïoh ba kan thep ha ka minit ban sa wai noh ka jingïakhun kaba la wan ha ka dur jong ka penalty.
Shwa ka jingpynïakhun ïa kane ka phainal, la pynlong shwa ruh ïa ka jingïakhun ban ïaknieh ïa ka kyrdan kaba lai ne ka third place, kaba hangne ka kynhun ba la rah ïa ka jingjop dei ka PFR hadien ba ka la pynliem noh ïa ka Mawlai Grassroot Centre.
Related Posts
Ka jingpynlong ïa kane ka phainal, ka dei artad ka sngi lyngkhuh snem ka sngi khlad kaba saw snem jong I (L) Kong Josephine Kharkongor, ha kaba la wan ban sakhi lang da ki khun ki kti bad ki khun ksiew jong i.
U Kongsan ba la wan ban ïa don lang dei u Rangbah Shnong ka Pynthor u Bah Syrpai Marbaniang bad ruh u rangïalehkai barim ka India Bah Eugeneson Lyngdoh kumjuh u Fr. Anthony Kharkongor.
Ha kaba kut jong ka jingïakhun, ka la dei pat ka pali ban sam ïa ki khusnam, ha kaba la ïarap ban sam lang da ki rang ialehkai barim kum ki jong u bah Richard Nongneng, Bah Freddy Kharpran, nalor u bah Khlain Pyrkhat Syiemlieh bad kiwei kiwei.
Ha kane ka sngi ka la don ruh ka jingsam ia ki khusnam ba shimet kaba kynthup ïa ka nam best goalkeeper kaba leit sha Denzil Kharngi ka RUFC, Top Scorer la rah da Habankara Blah ba la ïoh ban thep 10 tylli ki kol jong ka PFR bad Player of the Tournament ka leit sha u Bashemphang Diengdoh.