Jowai, Ïaïong 03 : Ka Tariang FC kala long syndon ka lahduh ha ka jingïalehkai phutbol kaba la tip kum ka ‘9th Secondary School Football Knock-out Tournament 2022-23’, ïa kaba la pynlong ha kane ka sngi saitjaiñ ha madan Pdengshakap.
Ha kane ka jingïakhun phainal ka kynhun jong ka Tariang FC kala jop da 3-1 kol ïa ka Umsalait SC, ïa ka kol ba nyngkong na ka Tariang FC kala ïoh ban thep lyngba u rangïalehkai jong ka u Allen Nongbri haka minit ba 12, katba u Knerktilang Buam ula theh ïa ki ar kol ha ka minit ba 73 bad 90.
Na ka liang ka kynhun ïalehkai jong ka Umsalait SC kala pyrshang ban pynphai ïa kitei ki kol hynrei kala ïoh ban thep tang shikol ha ka minit ba 75 lyngba u Arnes Marwein.
Ha kane ka lympung mynta ka snem ka kynhun ba ïoh rah ïa ka nam lahduh ka Tariang FC kala ïoh rong ïa ka song pisa kaba T.2,50,000 (ar lak sanphew hajar) tyngka katba ka kynhun ba wan ba ar ka Umsalait SC kala ïoh rong T.1,50,000 (Shilak sanphew hajar) tyngka lem bad ki trophy.
Ïa ka nam Best player la ïoh rah da u Knerktilang Buam uba la ïoh thep haduh ar kol ha kane ka jingïakhun phainal, ïa ka nam Best Goalkeeper la ïoh da u Frolick Dkhar kiba dei na ka kynhun Tariang FC.
Ïa ki khunsnam sha ki nongjop la sam da u kongsan jong kane ka sngi u J. Myrom DSP ka East Jaiñtia Hills, ha ka jingdonlang u ma H. Bareh Project Manager, ma K. Passah DSO West Jaiñtia Hills ryngkat, ki nongkitkam shnong nalor kiwei deki riew rangbah ka thaiñ bad ki paidbha nongwan peitkai.
