Mar ïakynnoh ka Assam bad Meghalaya halor ka jingjia ha Mukroh, phah pynshisha u Nongbishar da ki sabut
9 ngut ki nong Mukroh kiba la sakhi halor ka jingjia
Shillong, Iaiong 2 : Mar ïakynnoh hapdeng ki bor sorkar ka Assam bad ka Meghalaya kumjuh ruh ki nongshong shnong ka Mukroh halor ka jingjia shah siat iap ki hynriew ngut ki mynsiem briew ha ki pulit Assam kaba la jia ha ka 22 tarik Naiwieng 2022 kat kum ka Affidavit ba ki la ai sha ka Judicial Commission ba la khlieh da u Nongbishar Justice T.Vaiphei. Kumta halor kane na ka liang u Nongbishar T Vaiphei uba shim ïa ka jingtohkit halor kane ka jingjia um banse ban phah ïa baroh arliang mamla kumjuh ruh ïa ki nong Mukroh ban pynshisha da ki sabut kiba biang.
Haba u nongbishar u la bishar na ki Affidavit ba la ai da ki DGP jong ka Assam bad Meghalaya, Principal Chief Conservators of Forest (PCCF), Head of Forest Force (HFF), u MDC, u Rangbah Shnong bad ki 9 ngut ki nongshong shnong ka Mukroh, ka Commission ka la lap ba ka la mih ka jingïakynnoh mar kylliang halor ka jingjia bad kumta ka long kaba jwat ban shim rai na ki Affidavit.
Kumta ban pynïaid shakhmat ïaka jingtohkit bad jingbishar la hap ban khot pynshisha da ki sabut khnang ba ki jingshisha kin paw.
Na ka liang ka Commission ka la khot ïa u DGP jong ka jylla ban wanrah ïa ki jingpynshisha da kaba un wan mih hi ma u ne un phah da ki ophisar jongu ruh hakhmat ka Commission ha ka 14 tarik Iaiong ha ka jaka shong bishar jongka Commission hi.
Kat kum ka hukum la ong ban pynthikna ba ka jingtohkit kan dep kloi khlem kano kano ka jingpynslem kan kham bha ban ïalam lang ïa baroh ki nongsakhi ha katei kajuh ka sngi bad lada jia ba ym lah ban pyndep tohkit ïa ki yn bteng biang ha ka sngi ba bud kata ha ka 15 tarik khlem kano jingpynsahteng ïa ka kam.
Kat kum ka hukum na ka Commission ïa kine ki nongsakhi lah ban tohkit ruh da u DGP ka Assam, PCCF, HFF jongka Assam lane da ki nongïasaid jongki.
Lada donkam kino kino ki kot ki sla lah ban pan na ka Commission.Ka Commission ka kwah ruh ba ïa ka jingpyntip dei ban phah mar mar sha baroh da ka WhatsApp ne da ka email.
Ki nongsakhi na ka liang kito kiba shah siat iap ha Mukroh ki long kiba haïing ba kynthup ïa ka Khlan Phawa, Ploda Sumer, Riskhem Myertem, Nidawan Dkhar bad Rilis Nartiang baroh ki kynthei bad ki saw ngut ki nongshong shnong ka Mukroh pat ki kynthup ïa u Daman Bhoi, Paitlang Sumer, Bud Sumer bad Plan Bhoi. Kine ki la dep ai da ka jingthoh sha ka Commission myn ha ka Sngi Thohdieng.