Nga kren shai ba ngan nym leit ïuhkjat ban pan jingkyrshan na ki Harijan namar kin buh kyndon lypa: Adelbert

Shillong, Ïaïong 02: U MLA ka North Shillong Constituency u Bah Adelbert Nongrum u la ong ba wat la na ka liang jong u u la kren shai shuwa ka elekshon ba un ym leit iukjat ha Them Iewmawlong ban pan jingkyrshan na ki Harijan kiba sah ha katei ka jaka namar um kwah ban leit nguh leit dem ba ki kyrshan ïa u hynrei wat la katta ruh ki dang don kiba kyrshan ïa u ha kane ka elekshon kaba dang shu dep.
Haba kren bad u Mawphor u Bah Adelbert u la ong ba naduh ki sngi kiba ka elekshon kam pat da jan than haduh ka sngi kaba u ïalap ekeshon khatduh eh u la kren shai kdar ba da leilei un ym leit nguh leit dem ïa ki ba kin pynjop ïa u hynrei ka jingïoh vote jong u na kane ka jaka ka pyni ba ki dang don kiba ïohi ïa ka nongrim kaba u ïeng kaban pynmyntoi ïa baroh khoit. U la ïathuh ba lada u leit ban pan jingkyrshan na ki kin buh kyndon beit ba laa kin kyrshan ïa u u dei ban pyndep ki katto katne tylli ki jingangnud jong ki.
Haba kylli ïa ka daw kaba pynlong ïa u ban shim ïa katei ka rai, “Namar nga tip skhem ba lada nga leit ban pan jingkyrshan kin buh kyndon ïa nga kata ka long ba nga dei ban ïada ïa ki ba kin ïoh shong junom ha katei ka jaka bad ba ngan ym kren eiei shuh shaphang ka jingdawa ba la slem jong nga ba dei ban pynsted ïa ka jingpynkynriah ïa ki,” jubab u Bah Adelbert.
“Nga la ong da kaba shai ba ngan ym leit nguh leit dem ïa ki namar ngam kwah ban pynpoh ïa lade tang na bynta ka elekshon hynrei namar nga ïeng ha ka nongrim ba nga dei u trai bad ki pat ki nongshongwai balei ngan leit nguh leit tang namar ka elekshon bad dei na kane hi ka daw ba ngam shym la iuh kjat shisha ha katei ka jaka bad lada ngi peit ha ka ki elekshon ba la dep ruh kine ki la kyntait lupa ïa nga,” u la ong.
“Nga rung ym ban pynheh spah ïa lade hynrei ka nongrim ba khring ïa nga sha ka saiñhima ban kiew spah bad dei namar ka nongrim hi kaba la khang long ka daw ba nga jop elekshon bad ngan ym kynriah noh ruh na ka nongim tang na bynta ka elekshon,” u la bynrap.
Haba kylli pat ïa ka daw kaba ki don haduh 13 ngut kiba kyrshan ïa u ha kane ka elekshon ba dang shudep bad ruh namar ha u 2018 u ïoh tang 13 vote hi, “Ki don kiba sngewthuh ïa ka nongrim jong ngi ba nga bad ïa ka party ba ngim mih ban ïakhun tang na bynta kaba bha hynrei ïa kaba dei bad nga ai khublei kyrpang ïa kito ki 13 ngut ba na ka liang jong nga lei nga kwah ban kynduh markhamt bad ai khublei ba wat hadien ba nga kren shai hynrei ki kyrshan namar ki ruh lehse ki la sngewthuh ba ka dokam ban leh ïa kaba dei ym shuh tang ïa kaba bha kumba nga la kren sha u paidbah,” u la jubab.
Shuh shuh u la ong ba lada peit ha kane ka elekshon baroh kita ki stad kheiñ jingkheiñ saiñ hima bad kiba ju ai jingkheiñ mano ban jop ki la buh ïa u ha ka kyrdan kaba saw ne basan hynrei dei namar ka jingdon ki artair ba khlaiñ kaba la lah ban pynshaïong ïa kiba bun.
“Ka dei ka jingshisha ba ki la kheiñ rem ïa nga hynrei naduh ka sngi kaba nyngkong nga tip shai ba u paidbah um dei uba biej bad ka jingjop biang jong nga ha kane ka kynti ka dei namar ki don ki atiar kiba khlaiñ tam eh jong nga kita kinongvote ba jarjar,” u la ong.
“Ki don ki nongshong shnong jong ka constituency kiba la sah sha kiwei ki constituency kiba ka vote jong ki ka dang don ha Nort Shillong da ka mon lailuid khlem khmih lynti nongkylliang ne ap ba ngan da phone hynrei ki wan ban pyndep hok la la kamram bad ban ai jingkyrshan ïa nga,” u la bynrap.