Shillong, Kyllalyngkot 31: Ka long ka burom bad ka jingsngewsarong ïa ka jylla bad ruh ïa ka jaidbynriew hi baroh kawei hadien ba ka kynhun ki rang samla ïalehkai ba mihkhmat ïa ka kynhun Meghalaya ki rah namlahduh ha ka phutbol jong ka Khelo India Youth Games 2024.
Ka kynhun ka la lah ban rah ïa ka burom kum ka lahduh ban khur ïa ka takma ksiar dei hadien ba ka la pynliem noh ïa ka Punjab da 2 kol ha ka jingïakhun final kaba la long hynne ka Sngi Balang ha Madras University Ground, Main and B Ground JNIS (Tamilnadu).
ïa ka namtam ha kane ka jingïakhun ka la leit sha u Badondor Marbaniang u ba la thep ïa baroh kitei ki ar kol, kawei ha ka kylla step bad kawei ha ka kylla miet kaba la biang pura ïa ka kynhun ban khur ïa ka namjop.
Lah ban kdew ba ka kynhun ki rang samla ka jylla ka long ka kynhun kaba khlaiñbor ha kane ka lympung haba nujor ïa ka rukom lehkai, bad kum ban shu pynkynmaw, ka jylla ka la pynliem da 5-3 kol ïa ka Jharkhand wat hadien ba ka la shah lamkhmat lypa da ar kol ban ïohrung sha ka final.
Na ka liang u coach ka kynhun, u Bah Jeffrey Warlarpih u la pynpaw ïa ka jingsngewkmen hadien ba ka kynhun ka la ïoh ban kheit ïa u soh ka jingjop bad ruh u la ai khublei ïa ki rangïalehkai kiba la ïakhun tyngeh naduh kaba sdang ban pynurlong ïa ka jingangnud ban rah nam lahduh.
