Ai khublei u MR ka jylla ïa ka kynhun ba rah namlahduh ha ka Khelo India Youth Games 2023 Championship
Shillong, Kyllalyngkot 31: U Myntri Rangbah jong ka sorkar jylla-u Conrad K Sangma, u la pynpaw ïa ka jingsngewkmen bad ai khublei ïa ka kynhun phutbol jong ka Meghalaya hadien ba ka la wanrah nam ïa ka thaiñ da kaba rah namlahduh ha ka phutbol jong ka Khelo India Youth Games 2024 da kaba pynliem ïa ka Punjab da 2 kol ha ka final.
Na ka liang jong u Conrad u la ong ba kane ka namjop jong ka kynhun ym tang ba ka pynsngew sarong ïa ka thaiñ hynrei ka pynpaw shai ïa ka jingtrei shitom jong ki rang samla ka jylla kiba la mihkhmat ïa ka kynhun ha katei ka rynsan ïalehkai.
“Kane ka burom ym tang ba ka pynsngew sarong ïa ka Meghalaya hynrei ka pyni ruh ïa ka jinglenlade bad ka jingtrei shitom ki samla jong ka thaiñ. Nga ai khublei ïa ka kynhun (Meghalaya) kaba la lehkai bha bad seisoh ha kane ka Khelo India Youth Games 2023 bad ban wanrah ruh ïa ka khusnam sha la ïing.”
Haba ai jingkren hadien ba ka kynhun ka la ïohrah ïa ka namjop, na ka liang jong u Myntri ka tnat ïalehkai jong ka sorkar jylla-u Bah Shakliar Warjri u la ong, “Ka burom ba ka kynhun phutbol jong ka Meghalaya ka la ïoh na kane ka Khelo India Youth Games 2023 ka pyni ïa ka jinglong ba la kloi jong ka sorkar ban kyntiew ïa ki kam ïalehkai hapoh ka jylla. Ka jingwanrah ïa ki jingtei kum ki madan ka long kawei na ki daw kaba la kyntiew bha ïa ka jylla bad ki samla jong ka thaiñ ban kiew ha ka sports.”
Kumban shu pynkynmaw, ka jingïaidlynti shuwa ban poi sha ka thong, ka kynhun ka la sdang ïa ka jingpyrshang jied player lane kate ka selection trial kaba la pynlong naduh ka 4 haduh 5 tarik u Kyllalyngkot, 2024, bud sa ka Coaching cum Selection Camp ha ka 6-17 tarik u Kyllalyngkot, 2024, ha kaba 25 ngut ki rang samla kiba kynsai ki la shah jied ban mihkhmat ïa ka Meghalaya.
La pynlong ruh ïa ka send-off programme ha ka 16 tarik u Kyllalyngkot, 2024, ba la pynïaid da u Bah Khlain Pyrkhat Syiemlieh, u coach phutbol ba la paw jong ka Directorate of Sports and Youth Affairs (DSYA), ha kaba la ïadonryngkatlang u Bah Hamlet Dohling, President jong ka Meghalaya Football Association (MFA), Cliff Nongrum, Vice President jong ka MFA, Freddy Kharpran, Convenor jong ka Youth Cell ha MFA, Ailad K. Kynta dkhot jong ka DSYA.
Ka kynhun ka la jop da 2 kol ïa ka Punjab ha ka jingïakhun final, bad baroh ar kol la thep da u Badondor Marbaniang.