Shillong, ïaïong 12: Ka jinglah ban ïalehkai bha ki thei ïalehkai ka la pynlong ïa ka Meghalaya ban pynliem ïa ka Sikkim da kaba sah sa ar ngut ki wiket bad tang lai tylli ki bol ban sah ha ka final jong ka lympung 2nd NECDC Senior Women Tournament 2025 ha ka sngi Saitjaiñ ban rah ïa ka khusnam lahduh hadien ba ki la bteng ïa ka jingïakhun jong ki kaba khlem shah rem ha baroh kawei ka lympung.
Haba beh ïa ka thong jong ka Sikkim kaba la kamai 114/4, ha kaba ka Meghalaya ka la lah ban kamai 115/8 ha ki 19.3 ober bad ka ron kaba pynjop la tied da ka Riticia Nongbet.
Ka Sikkim Cricket Association ka la long ka nongpynïaid ïa kane ka lympung, kaba la pynlong da ka North East Cricket Development Council kum shi bynta ban kyrshan ïa ka jingroi jong kane ka jingïalehkai ha kane ka thaiñ. Ka Sikkim bad ka Nagaland ki la long ki lahduh ryngkat lang lane joint champion ha ka sien kaba nyngkong ba la long ha u snem ba la dep ha Ri-Bhoi (ka final kam shym la lah ban jam shakhmat namar ka jingshah pynthut ha u slap).
Ka Sikkim sa shisien ka la pynshisha ba ka dei ka kynhun kaba khlaiñ bor, ha kaba ka la jop ia baroh ar tylli ki jingïakhun ha ka Group B pyrshah ïa ka Arunachal Pradesh bad ka Manipur shuwa ba kan pynliem ïa ka Nagaland ha ka semifinal.
Ka Meghalaya kaba la rung sha ka semifinal ha u snem 2024 ka la jop ïa baroh ar tylli ki jingïalehkai ha ka Group A, kiba long pyrshah ïa ka Mizoram bad ka Nagaland shuwa ba kan pynliem ïa ka Manipur ha ka semi final ha ka sngi Thohdieng.
Ki la shañiah tylli ha ka Debasmita Dutta ban beh ïa ka thong ha ka sngi Saitjaiñ, ka thei ïalehkai kaba la seisoh bha ha baroh kawei ka lympung, bad ka nongap wiket ka Monica L Phawa. Ka Debasmita ka la kamai 35 ron na ki 41 tylli ki bol kum ka nongtied kaba mih nyngkong (opening batter), da kaba thlieh saw tylli ki Four, katba ka Monica ka la kamai 37 ron na ki 28 bol, kaba kynthup ïa lai tylli ki four bad kawei ka six. Ka jingshah pynkhyllem jong ka na ka bol kaba khatduh jong ka over kaba 18 ka la ai jingkyrmen ïa ka Sikkim. Ka jingkhyllem noh jong ka ka la pynlong ïa ka Meghalaya ban dang donkam sa 11 ron ban jop na ki 2 over, bad ka sah sa tang ha ki nongtied kiba hadien ban pynpoi sha kaba kut jong ka thong.
Ka Meghalaya ka la ïoh ban kamai san tylli ki shi ron ha ka ober kaba 19, ba la kawang da ka Primula Chettri jong ka Sikkim, kaba la seisoh bha ha kane ka jingïalehkai da kaba khur 4/28 naki 4 ober. Kane ka la pynlong ban donkam sa hynriew ron ban kamai na ka ober ba khatduh ba la kawang da ka Mariam Subba. Ka Deimaphisha Lamare ka la tied ïa kaba nyngkong ban kamai ar ron hynrei ka la shah pynkhyllem noh lyngba ka LBW ha ka bol kaba bud. Sa saw tylli ki bol ban kamai saw ron bad ka Riticia ka la jam shakhmat ban thlieh da ka saw ron kaba la pynkmen ïa ki paralok ba mih madan ryngkat.
Hashwa kane, ka Sikkim ka la sdang suki bha hynrei ka la lah ban kynjoh ïa ka thong ba la buh da ka jingtrei shitom jong ka Pretika Chettri (29 ron na ki 20 bol) bad ka Priyanka Kurmi (43 ron na ki 27 bol). Na ka bynta ka Meghalaya ka Debasmita (khur 1/24 na ki 4 over) bad ka Monica Singh (khur 1/26 na ki 4 over) ki la ïoh ban khur mar shi wiket, katba ki arngut kiwei pat ki nongtied ka Sikkim ki la shah pynhap lyngba ka run out.
Ka Monica L Phawa ka la ïoh ban khur ïa ka nam ‘Player of the Final’ bad ka Primula ïa ka nam ‘Player of the Tournament’ bad ïa ka ‘Top Wicket-taker award’. Ka Samayita Roy Prodhan jong ka Sikkim ka la khur ïa ka Top Scorer.
Ha kane ka jingïalehkai final la ïadonlang u Honorary Secretary ka Meghalaya Cricket Association u Bah Rayonald Kharkamni ban ai mynsiem ïa ka kynhun ïalehkai jong ki kynthei ha baroh kawei ka lympung ïalehkai.
