K a Kong Ampareen Lyngdoh, myntri ka sorkar jylla, ka la kren ïa ka mat kaba shai bha, kum ba shai ka sngi u bnai bad katei ka dei halor ka bor jong ka sorkar jylla bad ka jingpyntreikam ïa u Aadhaar number, da kaba ka ïathuh, ba katei ka jingpynrung ïa utei u number, ka dei ka kamram jong ka sorkar India.
Lyngba ka jingkren jong ka myntri, ka la biang ba ki nong ïakhih lane ki paidbah, ba kin sngewthuh ba katei kam dei satia ka kam, ban ïakhih ha Shillong lane ha Secreteriat, hynrei ka dei sha Delhi lane ha Parliament bad ka jylla, ka don mynta ïa 3 ngut ki dkhot bad ka dei ka lyngkor jong ki, ba kin ïa thalaiñ ïa kane ka ishu, kaba ktah ïa ka ïap ka im jong ki nongthep vote jong ki.
Ha ki khyndiat sngi ba ladep, la ïohi, ba ka Lok Sabha, ka ïohsngew tang ïa ka sur jong ki high level, hynrei kam ïohsngew pat ïa ka sur jong ki low level bad kata ka long, ba ka jingkren ka mih halor ka khaïi tuh dewïong lane ka jingweng ïa U Vice Chancellor jong ka NEHU, hynrei kane ka jingkren halor ka jingduh khaw, duh health insurance, duh scholarship bad baroh jait ki jingduh na ka daw jong u Aadhaar, kam pat don satia bad kumta ka jubab jong ka myntri, ka da ïahab hi sbiak ba kito ki nongjied MP, ki dei ban leit tur sha ka ïing sah jong ki MP, ban pynbor, ba kin tied teng noh ïa ka ïap ka im jong ki low level.
Wat la katei ka jingkren, ka ïahab sur bha, kumba tem guitar u Conrad bad ki nong Syntung, hynrei ka dei pat ruh ka bynta jong katei ka myntri, ba kan pyrkhat khia, la ka sngewhun ne em, ba ki 51 percent ki nongshong shnong, kin shah thngan noh, tang namar ba kim don ïa utei u Aadhaar number bad lada jia ba ka hun, ba kitei ki 51 percent, kin ïa phai noh sha ka bam shriew bam phan thiang, bam jhur khlaw, kata ka shong ha ka jingstad bad ka jing shemphang jong katei ka myntri.
La ju ong ruh, ba ha ka ri synshar paidbah, u shait jop uba bun bad wat ha ka elekshon ruh, u jop uba bun tam ka jingïoh vote; kumta ha kane ka kynti ruh, lada jia ba u bym don Aadhaar, u kham bun, kumta un duh khaw pynban, da uba bun bad un ïoh da uba khyndiat bad ka aiñ, ka la pyrdet noh.
Ka myntri ka la kren shai, ïa la ka jong ka dor bad ïa la ka jong ka bor bad kane ka pyni, ba kumno ki heh jong kane ka sorkar, ba ki shong synjor haduh katta katta, ha ka jingïadei jong ki bad ka sorkar NDA ha Delhi bad haba ka long kumne, ka la dei shisha, ka jingkren jong u symbud Myntri Rangbah, da kaba u ong, “hap shu leit rah bowl sha Delhi” bad kane hi ka jingkren ka kdew shai, ba kine ki Myntri jong ka sorkar MDA, kin ïai pyndem bad pynjem ïalade, haba ka sorkar India, ka thaw ïa ki aiñ kiba pyrshah ïa ka jylla ruh, kumba ka jia ïa ka National Registration Certificate (NRC), ka CAA, nangta sa ka jingkurup ïa ka hok jong ki trai par dewïong, ka jingpynduh noh ïa ka hok jong ki trai khyndew bad ka jingpyneh ban pynslem kai ïa ka aiñ ILP bad ka Sixth Schedule, kiba dei ki aiñ ban pynkhlaiñ bor ïa ka jaitbynriew rit paid Khasi Jaiñtia.
Lah ban pynkymaw ruh ba u Symbud Myntri Rangbah ka jylla uba khmih ïa ka tnat Kam Pohïing ka sorkar jylla u Bah Prestone Tynsong u la ong ba kam satia ka jingkylli ba ka sorkar jylla ka pynbor ïa ki paidbah ba kin pynrung kyrteng Aadhaar, hynrei ka shong beit ha ka mon jong ki paidbah.
U la ïathuh ba ha ka por mynshwa ki nongshong shnong ki tieng ban pynrung kyrteng Aadhaar hynrei mynta ki por pat kiba bun ki nongshong shnong ki la leit hi dalade ban pynrung kyrteng Aadhaar namar ki sngewthuh ba dei tang da kane ka lad ba kin ïoh ki jingmyntoi kiba ka Sorkar jylla bad sorkar Pdeng ki ai.
U la ïathuh ruh ba ka Sorkar jylla kam pynbor ban pynrung kyrteng Aadhaar namar kane kam dei ruh kaba la wan na ka sorkar jylla hynrei kadei kaba la khmih da ka sorkar Pdeng.
Lah ban pynkymaw ruh ba ka Ïingkashari ba halor duh ka ri India ka Supreme court ka la dep ai ïa ka jingbishar ba ym lah ban pynbor ne pynlong kongsan ka sorkar ïa ki nongshong shnong ka ri ban pynrung kyrteng Aadhaar.
