Lahduh ka Jaïaw Pdeng bad DUBAKH ‘A’ ha ka Maitshaphrang Khasi League Basketball Tournament 2023
Shillong, Rymphang 20 : Ha ka 20 tarik Rymphang 2023 ka KSU Mawlai Circle ka la ïoh ban pynhap pyrda noh ïa ka Maitshaphrang Khasi League Basketball Tournament 2023. Ïa katei ka Tournament lawan ban pynhap pyrda noh da u Bah Danny M. Khyrïem uba dei u Vice-President barim jong ka KSU Sengkmie.
Hashwa ban pynhap pyrda ka la don ka jingïalang kaba lyngkot ba la pynïaid da u Samla Mekenson Marbañiang Asst Finance Secretary KSU Mawlai Circle, la ïoh ïa ka jingkren pdiang sngewbha bad maitphang na u Samla Rapborlang Nongrum General Secretary KSU Mawlai Circle. Haba ai jingkren na ka liang jong utei u nongïalam u la pynpaw ba ka jingshim jong ka KSU ban pynlong ïa kiba kum kine ki Tournament ka long ban pynshlur ïa ki khun samla jong ka Jaidbynriew ba kin sei ïa la ki sap kaba ki don.
U Samla Eric Nongkynrih Assistant General Secretary KSU Central Executive Council haba ai jingkren kum u Symbud Kongsan ula ai mynsiem ïa ki samla ba kin ïashim bynta ha kiba kum kine ki jingïalehkai. U Bah Danny M.Khyrïem u la pyn kynmaw ba ka KSU dang ha kine ki sngi ba dang shu dep ka KSU Sengkmie ka dang dep pynhap pyrda ïa ka Maitshaphrang Khasi League 20twenty Cricket Tournament kaba long ka jing ailad ïa ki khun samla ha katei ka jingïalehkai. Na ka liang jong utei u nongïalam barim u la pyn kynmaw ba ha ki por ba ki dang don ha ka seng ki ju pynrung kam ïa ki nongïalehkai ha ki ophis treikam bapher bapher halor ka nongrim ba ka don ka sports Quota, u la pynpaw ruh ka jing bynñiaw haba ïanujor ïa la ka Jylla bad ka Jylla Manipur na ba haman la ki sport ki samla Manipur ki don beit kumjuh ruh la ka dei ha ka Eksam UPSC na Jylla Manipur yn ym duna ïa ka 3ngut ki ban pan IPS ne IAS.
Kumta u la ai mynsiem ïa ki khun samla ba kin trei shitom la ha ki jing pule ne ha ki kam ïalehkai khnang ba ka Jylla kan kiew shaphrang shajrong. Ha kane ka sngi pynhap pyrda ka jing ïakhun phainal jong ki Kynthei ka long hapdeng ka DUBAKH ‘A’ pyrshah ïa ka DUBAKH ‘C’ ha kaba ka DUBAKH ‘A’ kala ïoh ïa ka nam lahduh katba ha ka liang ki Shynrang ka Jaïaw Pdeng ka la ïakhun pyrshah ïa ka ka SYM ha kaba ka Jaïaw pdeng ka la ïohrah ïa ka nam lahduh.