Lah duh ka Mawpharkhrew SC bad ka Kharkutta ha ka Open to All VT 2024 ha Mawkyrwat
Mawkyrwat, Risaw, 20: Ka Mawpharkhrew Sports Club jong ki kynthei bad ka Kharkutta na North Garo Hills District jong ki shynrang ki la long ki ar tylli ki kynhun kiba la rah ïa ka nam lahduh ha ka Open to All Volleyball Tournament 2024 ba la pynïaid da ka South West Khasi Hills District Volleyball Association (SWKHDVA) ha Madan ïalehkai volleyball hajan Artificial Turf, Nonglang, South West Khasi Hills District.
Lah ban kdew ba ïa kane ka lympung ïalehkai volleyball la pynlong khnang kum shibynta jong ka jingrakhe ïa ka jingdap 10 snem jong ka South West Khasi Hills District Volleyball Association (SWKHDVA).
Haba phai pat ha ka lympung ïalehkai phainal ba la pynlong ha ka sngi saitjaiñ jong ka taïew, ka jingïakhun jong ki kynthei ka long hapdeng ka Mawpharkhrew Sports Club pyshah ïa ka Nonglang Sports Club ha kaba ïa ka nam jop la rah da ka Mawpharkhrew SC kaba la jop da 3 – 0 set.
Katba ha ka jingïalehkai phainal jong ki shynrang pat kaba dei hapdeng ka Kharkutta na North Garo Hills District pyrshah ïa ka Nongkynbah Sports & Cultural Club bad ïa ka nam lahduh la rah da ka Kharkutta kaba la jop da 3 – 1 set.
Hadien ba kut jong ka jingïalehkai, na ka liang ka association ka la ïoh ban sam ïa ki khusnam sha baroh saw tylli ki kynhun kiba la poi sha ka phainal kata kaba rah ïa ka nam jop bad kumjuh ruh kaba shah rem noh bad ruh lah sam de ïa ki khusnam shimet kata ka ‘thei ïalehkai ba tbit tam ka leit sha ka Balapynkmen Nongsiej jong ka Mawpharkhrew SC bad jong ki shynrang pat la ïoh da u Maitphang Snaitang jong ka Nongkynbah Sports & Cultural Club katba u Rakrim N. Areng uba ïoh ïa ka nam kum u nongïalehkai babha tam jong ka Kharkutta.
Ha kane ka sngi la ïoh ruh ki jingkren ai mynsiem bad kyrkhu kyrdoh ïa ki ‘rang bad ki ‘thei ïalehkai na u kongsan u bah Renikton Lyngdoh Tongkhar, MLA ka Mawkyrwat Constituency bad kumjuh ruh na u bah Peter Passah, MCS, Working President jong ka Meghalaya State Volleyball Association kum u symbud kongsan ha ryngkat ka jingdonlang u bah G.G. Bung Snaitang, u bah H.S. Diengdoh lem bad kiwei de naduh u bah Elevenson Wanniang, President ka South West Khasi Hills District Volleyball Association, u bah Forwardman Nongrem, Vice President ka South West Khasi Hills District Volleyball Association bad kiwei de ki nongkitkam.