Lada la leh burom ïa ki nongïaleh laitluid, donkam ruh ban burom ïa ki nongthoh kot

Shillong Naiwieng 17: U Principal barim jong ka jaka pule ka St Edmunds College u Dr Sylvanus Lamare ha ka jingkren jong ha ka sngi rakhe ïa ka lyngkhuh sngi ïap ba 114 jong u Babu Rabon Sing Kharsuka uba dei u nongthoh kot ba pawnam jong ka Ri Khasi u la ong ba ka jylla ym tang ba kadei ban kynmaw ïa ki riewshlur kiba la ïakhun laitluid da ka ryntieh ne u sum hynrei donkam ruh ban pynburom ïa ki briew kiba la pynneh pynsah ïa ka riti dustur, ka kolshor bad khamtam eh ïa ka niam tynrai.
Watla u Babu Rabon Sing Kharsuka u la don bynta ha ki kam jong ki Balang Khristan hynrei u la ïaineh ban pynneh pynsah ïa ka riti dustur u Khasi kaba la sdang naduh mynhyndai na ki kulong kumah.
Ha kaba ïadei bad kane na ka liang u Dr Sylvanus Lamare u la ong ba ka jylla manla ka por ka burom ïa ki nongïaleh laitluid kiba kynthup ïa u Tirot Sing Syiem, u Patogan Sangma, u Kiang Nangbah bad kiwei kiwei da kaba ai shuti ha ki sngi burom jong ki, ka la dei ka por ba ïa ka sorkar jylla kan kynmaw burom manla ka 16 tarik mynta u bnai ban kynmaw burom ïa ki nongthoh kot ne ban pynlong ïa kane ka sngi kum ka Rabon Sing Kharsuka Memorial Day.