Shillong, Naiwieng 17 : Ka Voice of the People’s Party (VPP) ha ka sngi Saitjaiñ ka la pynlong ïa ka State Convention kaba ar ha ophis treikam jong ka party ha Lad Nongkrem ha kaba la ïa donlang ki nongïalam jong ka party bad ki delegate na ki 36 tylli ki Constituency.
Ha kane ka convention ha ka kylla kaba nyngkong la ïoh ïa ka kaiphod treikam jong ka party naduh ba la seng ïa ka ha u snem 2021 ba la wanrah da u Secretary ka Party u Dr. Ricky Syngkon.
La pynsngew ruh ïa ki jingkhein jingdiah jong ka party ba la wanrah da u Treasurer Bah Grossper Ryntathiang.
Hadien lah ïoh ruh ïa ka jingïaphylliew jingmut na ka bynta ban pynkhlaiñ shuh shuh ïa ka Party khamtam na bynta kane ka elekshon MDC kaban sa wan.
Ha ka kylla kaba ar pat la pynlong ïa ka jingïajied ïa ki nongkitkam ba thymmai ha ka jingpynïaid jong u Dr. A. Rani kum u Proterm Chairman.
Ha ka jingïajied ki delegate ki la shaniah biang ha u Bah Ardent Basaïawmoit kum u President bad ïa u Dr. Ricky Syngkon kum u Secretary bad kiwei kiwei ki nongkitkam ruh kineh ki juh.
La pynthymmai ïa ki nongkitkam ka Youth Wing ha kaba la jied ïa u Bah Marbud Dkhar kum u President bad Samla Nathaniel Mawrie kum u Secretary katba ïa i Kong P.Syiem la jied kum ka President jong ka Women’s Wing.
