Lada ki nongjied ki dei kiba bamsap, ngin ïoh ruh da ki nongmihkhmat kiba bamsap : HYC

Kynshi, Rymphang 16: U President jong ka HYC Seng Kmie, u Bah Robertjune Kharjahrin, u la ong ba lada ki paidbah nongthep vote ki shim pisa ha ka por elekshon kaba mut ki bamsap, ka jylla kan ïoh ruh da ki nongmihkhmat kiba bamsap. Nangta lada ki paidbah ki buaid shongshit ha por elekshon, ka jylla kan ïoh da ki nongmihkhmat kiba buaid bad ki nongthep vote kiba khuid kin pynmih ruh ïa ki nongmihkhmat kiba khuid.
U Bah Robert u la kren ïa kane ha ka jingïalang Ka Rai Ehdaw Campaign jong ka Seng kaba la long ha ïew Kynshi, Kynshi Mawria mynta ka sngi.
Kane ka Campaign jong ka HYC kadei kaba la pynmih ruh da ki kot lyngkdop bad ki jingïalang ha kylleng kylleng ka Ri Khasi Jaiñtia naduh kine ki sngi kiba ladep.
U Bah Robert u la ong ruh ba ka jingdon ki katto katne ki nongthep vote kiba buaid, ka pynlong ïa ka Assembly ka ban rai ban pynmih bun ki wine store ne ki jaka die kyiad ban pynsuk ïa uba dih. U la ong ba kadei ka jingshisha ba ka sorkar ka ïaleh ban pynmih bun ki Counselling Centre bad kadei ka juh ka sorkar kaba pynmih ruh bun tylli ki wine store. “I thamula teng teng ïa ki Polisi treikam jong ka sorkar”, u la ong.
Kumta u la kyntu ïa ki paidbah nongthep vote ba kin shimkhia bad pyrkhat bha haba jied ïa ki nongmihkhmat namar kadei ka kam kaba kyntang. U la pynkynmaw ba ka Ktien U Blei ka hikai ïa lai tylli kiei kiei ha kaba ïadei bad ka jingjied ïa ki nongsynshar bad ki nongthawaiñ. Kawei na kine ka long ba dei ban jied ïa ki nongsynshar kiba tieng burom ïa U Blei, kaba ar ka long jied ïa u briew ne ka briew kaba lah ban shaniah bad kaba lai ka long ban jied ïa u briew u ban nym shah ban pyngngop ha ki kam bamsap bampong.
“Lada ngi kum ki paidbah ngi la lah ban pynshongnongrim ha kine ki lai tylli ki jinghikai haba jied ïa ki nongmihkhmat ka ri bad ka jaidbynriew kan sa long kaba phyrnai”, la ong u Nongïalam ba rangbah ka HYC.
U la ong ruh ba kam synshar khadar kam dei kaba suk, donkam ban ïoh ïa ka jingsynshar kaba khynja Blei bad kam mynroi kata ka jingpass ïa ki Master Degree ne ïa ki degree kiba pher bapher, namar ba ha ka synshar khadar donkam ban tip lut ïa ki jait sobjek. Dei namar kane ka daw donkam ïa ka jingstad ba kynja Blei.
U Bah Robert u la ther tyngeh ruh ïa ka sorkar MDA hapoh ka jingïalam ka NPP kaba la lilam noh ïa ka khyndew ka shyiap haduh kumba 18 Sq Kilometer sha Assam lyngba ka MoU jingïapynbeit pud bad kine ki jaka baroh kidei na Khasi Jaiñtia ym dei na thaiñ Garo Hills. “Ngi donkam ban ïoh noh da u Myntri Rangbah na ka jaidbynriew la jong namar un khamtip khambha ïa ka jinglong ki jaka ki puta kiba hap ha Khasi Jaiñtia bad khamtam kiba don ha khappud bad ka Assam.
Ha kaba ïadei bad ka jingpynrung ïa ka ktien Khasi ha ka Khyrnit kaba phra jong ka riti synshar ka ri India, u Bah Robert u la ong ba wat lada ka Assembly ka la mynjur ïa ka Resolution, hynrei imat ka jingbuh lang ïa ka Ktien Garo kaba lehse ka dang duna ha kiba bun ki liang ka la pynsuki lang ïa ka ktien Khasi ban rung ha ka khyrnit kaba phra.
U la ong ruh ba ha kane ka elekshon 2023 yn ithuh kino ki Constituency kiba kyrshan CAA bad kino kiba pyrshah ïa ka CAA, tangba kawei kaba shai ka long ba ka MP jong ka NPP na Tura ka la kyrshan ïa ka CAA ha Parliament.
U la ther ruh ïa ka jingbamsap kaba don ha ka Saubhagya Scheme ne ka jingai ding elektrik ïa ki ïing baduk sha nongkyndong. Ka jingwanrah ïa ka aiñ khalai, kaba wat hapdeng ka jingpyrshah ki kynhun niam, ki Sengbhalang, ka sorkar ka la shu pynsangeh tang lyngba ka Ordinance kaba hynriew bnai bad lada ym lah ban wanrah ïa kane ka dorbar ka ban long ha u bnai Lber mynta hi ka snem, kane ka aiñ kan imbiang bad ki lai tylli ki laisen kaba la ai ban khalai casino kin im biang.
Ha kane ka jingïalang ba la pynïaid da u Sordar ka Shnong Kynshi Mawria, u Bah P. Sohkhlet, la ïoh ruh ïa ka jingkren na u Bah Lumlang Kharsyiemlieh, uba long u President jong ka HYC West Khasi Hills District.