Tura, Rymphang, 16: U Myntri ka tnat Kam Pohing u Amit Shah ha ka sngi Palei u la kynthah tyngeh ïa ka National Peoples Party (NPP) ba la ïalam da u Conrad K.Sangma kaba iehbeiñ ïa ka Jylla Meghalaya khlem ki kam pynroi.
U Shah u la ai jingkren ha ka jingïalang jong ka BJP kaba la long ha North kum shi bynta ka jingïalap elekshon na ka bynta ka elekshon sha ka Iingdorbar Thawaiñ ka Jylla ka ban sa long shen.
U Shah u la ñiew tang ïa ki kam pyntoi bapher bapher ba la leh da ka Sorkar Pdeng hapoh ka jingïalam jong u Myntri Rangbahduh ka ri u Narendra Modi na ka bynta ka thaiñ Shatei Lammihngi.
Haba kyrpad ïa ki paidbah ban pynjop ïa ka BJP, u Shah u la ong, “nga wan hangne ban kyrpad ïa ki paidbah ba kin ai vote ïa ki kyrtong jong ngi bad ban pynrung ïa ki ha ka kynhun jong u Modi. Nga kular ïa phi, pynlong ïa ka BJP ka party kaba khlaiñ, bad ngin sa pynkut ïa ki jyrsieh bamsap ha Meghalaya. Ym lah ban lah ban khanglad ïa ki kam pynroi lada ka sorkar arjin ka wan ha bor.”
“Ka long kaba sngewsih ba baroh ki skhim ba la pyntreikam da ka Sorkar Pdeng kim shym la poi sha Meghalaya,” la kynnoh u Shah. Hynrei, ka BJP ka la ïaid la ka jong ka jylla na ka jingïatreilang ban ïakhun marwei ha baroh 60 tylli ki Constituency,” la bynrap u Shah.
Haba kren halor ka jingjyrsieh ka bamsap ha Meghalaya, u Amit Shah u la ong, “ym pat don hangno hango ha ka ri India ba phin ïohi ïa ki jyrsieh bamsap kaba la paw pylleiñ ha Meghalaya. Ka long kaba sngewsih ban ong ba ka Meghalaya ka dei kaba don ha ka kyrdan banyngkong eh ha ka kam bamsap ha ka ri baroh kawei, kaba pynpaw ïa ka jinghiar arsut jong seng riewlum kaba bat ïa u lakam synshar mynta ha ka jylla.”
Ha ka sngi Balang, ka BJP ka la pyllait paidbah ïa ka Manifesto na ka bynta ka jylla Meghalaya shwa ka elekshon da ka jingkular ban ïakhun tyngeh ban weng ïa ka jingeh jong ki paidbah kiba sah ha khappud ka Assam bad Meghalaya lygba ki jingïakren, ban pyntreikam ïa ka 7th pay commission ha Meghalaya, ban kyntiew arshah ïa ka jingsiew baibam sha kiba la tymmen, ban wanrah ïa ka skhim kaba ïarap kyrpang ïa ki samla bad ban thaw ïa ka State Task Force khnang ban tehlakam ïa ki kam tih marpohkhyndew be-aiñ bad ban kyntiew ïa ka scientific mining ha Meghalaya.
