Lada ka sorkar la pynlong tamasa Sngi U Blei, yn mih sa kiba pynlong mela bad khwai ruh: JAC

Shillong, Risaw 10: I Kong Purity Phawa, iwei na ki nongïalam ka JAC ban pyrshah ban pynlong Tamasa ha ka Sbfi U Blei, i la ther tyngeh ïa ka jingkuman ka sorkar ban pynkynriah noh ïa ka jingpynkut ïa ka tamasa Cherry Blossom ha ka Sngi U Blei.
Haba ïakren bad ki nongthoh khubor hadien ba ka Shnong kam shah ban pynlong ïa ka jingïalang ha ka ïew Bhoirymbong, i la ong ba lada ka sorkar kaba synshar ïa u paidbah ka ïalam hi dalade ban pynlong ïa ki tamasa ha ka sngi U Blei, hato ka lah mo ban khang lada don kiba pynlong mela, kiba pynlong ki jingïakop khwai dohkha ha ka Sngi U Blei?. “Kane kadei kaei kaei kaba ka sorkar kadei ban pyrkhat bha”, i la ong.
Shuh shuh i la ong ba wat lada ym lah ban kam ba ka Meghalaya kadei ka jylla Khristan, hynrei ym lah ban le pat ba kiba bun, kumba 73% na ki briew kiba shong hangne kidei ki Khristan ba ka sorkar kadei ban burom keiñ ïa ka sur bad ka jingpynsngew jong ki paidbah. Nalorkata kiba don ha ka kynhun Myntri ruh kiba bun kidei ki Kristanm, hato kim tip ba ka Sngi U Blei kadei ka Sngi kaba khuid, ka sngi kaba kyntang?. I la ong ba kum ki Khristan kidei ban pyrkhat bha ïa ka jinglong jingim jong ki shimet shimet bad na ka bynta u paidbah ruh.
I la ong ba wat u Myntri ka tnad Tourism kaba dei ka tnad kaba pynlong ïa kane ka tamasa, kata u Bah Paul Lyngdoh, udei hi u khun Khristan, te balei pat ba um pyrkhat lem ïa ka jingsngew jong kiwei. Ha ka jingshisha ki la dei ban kham pynjynsur ka mynsiem ban kiar na kaba pynlong tamasa ne pynkut ïa ka tamasa ha ka Sngi U Blei.
I Kong Phawa, i la pynkynmaw ruh ha ki snem 2000- 2001 ki paidbah ki la ïamih ban kyrshan ïa ki mat jingïakhih ba la lam khmat da u Bah Paul Lyngdoh. “Ngi la ïa mih na ki College, ki ophis ban kyrshan ïa u Bah Paul. Hynrei mynta u klet noh pat ïa kane ka jingkyrshan ba u ïoh na ki paidbah?”, la ong ka President jong ka STIEH.