Shillong, Naiwieng 10 : Kum ka jingpyrshang ban kyntiew ïa ka sap rwai tynrai ki khynnah skul ha ka jylla, ka tnad Arts & Culture ryngkat bad ka Shillong Public School, ha ka sngi Palei ki la pynlong ïa ka State Level Inter-School Traditional Singing Festival & Competition ha Lariti Performing Centre, Mawdiangdiang.
ïa katei ka jingïakob rwai tynrai la pynlong ha ki 3 kyrdan kaba kynthup ïa ka Solo, Duet bad Group ha kaba la wan ban ïashimbynta da bun tylli ki skul kiba na kylleng jong ka rilum Khasi bad Jaintia.
U Commissioner & Secretary ka tnad Arts & Culture u Bah FR Kharkongor kum u kongsan ula sam ïa ki khusnam sha ki nongjop ha kane ka jingïakob bad ula pynbna ruh ba ki nongjop ha kane ka jingïakob kin ïoh ia ka lad ban pyni ïa ka sap rwai ka jongki, ha ka sngi sdang jongka Jan Jatiya Gaurav Divas ka ban long ha ka 15 tarik u Naiwieng bad ha ka Tri Hills Ensemble programme ka ban long ha ka 24 tarik u Naiwieng kaba dei ka prokram ka ban pynlong da ka tnad Arts & Culture jong ka jylla.
Haba phai sha kane ka jingïakob, ha ka kyrdan Solo ïa ka nam lahduh la ïohrah da ka Meghalaya Police Public School, Baar ka St Edmunds School bad balai la ïoh da ka Pariong Presbyterian Higher Secondary School.
Ha ka Duet ïa ka nam lahduh la ïoh da ka St Marys Higher Secondary School, baar la ïoh da ka Meghalaya Police Public School bad balai la ïoh da ka St Edmunds School.
Ha ka Group ïa ka nam lahduh la ïoh rah da ka St Edmunds School, ka Seven Set Higher Secondary School kala wan Baar bad ka Meghalaya Police Public School kala wan Balai.
Ha kane ka sngi ka KC Lights Choir kaba la ïoh dang shen 2 tylli ki takma ksiar ha ka International Choir Competition ka la pynsngewtynnad ïa baroh lyngba ki jingrwai ki jongka.
