Phah skul ïa la ki khun bad ban shim ki lad jingsumar ki ba bha, pynshlur u DC ïa ki kmie ki kpa

Mawkyrwat, ‘Naiwieng 10: Ka Meghalaya Early Childhood Development Mission & Rescue Mission (MECDM&RM) ryngkat ka jingïatreilamg bad ka ophis jong u Block Development Officer (BDO) jong ka Ranikor C&RD Block mynta ka sngi ka la pynlong mynta ka sngi ïa ka Block Level Collaborative Convention on Meghalaya Early Childhood Development Mission & Rescue Mission halor la phang pdeng, “Ka jingsdang kaba skhem na ka bynta ka lawei kaba phyrnai” ha Hall jong ka ophis u Block Development Officer (BDO) Ranikor C&RD Block.
U bah T. Lyngwa, IAS, Deputy Commissioner jong ka South West Khasi Hills District haba kren kum u kongsan u la ong ba ka jingthmu jong kane ka Meghalaya Early Childhood Development Mission & Rescue Mission (MECDM&RM) ka long na ka bynta ban saiñdur ïa ka longbriew manbriew jong u khynnah khnang ba un heh un san pura ha ka met ka phad, ka jingmut jingpyrkhat bad ka jinglong mynsiem bad khnang ba u khynnah un san pura bha, u donkam ïa ki jingbam kiba tei kiba ki lah ban ïoh lyngba ki Anganwadi Centers.
Namarkata, u la ong ruh ba ka sorkar ka sngew ba da ka jingdon jong ki Anganwadi Centers kim pat biang, kumta ka la pynmih ïa ka Meghalaya Early Childhood Development Mission & Rescue Mission (MECDM&RM) lyngba ka jingïatreilang bad ka Health, Education, Social Welfare, Community & Rural Development ryngkat ka jingïasnohkti lang bad ki kmie ki kpa, ki nongri nongsumar, ki nonghikai bad kiwei kiwei na ka bynta ban pynmih ïa ki nongshong shnong kiba biang ba san pura nadong hadong ki ban long ki nongsaiñ dur ïa ka longïing longsem, ka imlang sahlang bad ka lawei ïa ka jaidbynriew.
Ha kajuh ka por ula pynshlur ïa ki kmie ki kpa ban phah skul ïa la ki khun bad ban shim ki lad jingsumar kiba bha na ka bynta ki longkmie kiba armet bad ki khyllung khnang ban pynduna ym tang ïa kiba pep skul shiteng por, hynrei ha ka jingbun ki longkmie kiba armet bad ki khyllung kiba ïap. Namarkata, u khot u wer ïa ka jingïatreilang bad ka jingïadonbynta lang jong ki Self Help Groups, ki VECs, ki kmie ki kpa khnang ban lah ban pynurlong ïa ka jingthmu. Shuh shuh u la ong ba donkam ban ai ka jingkyrshan ïa ki Skul Pynpaw kiba la don lypa ha ki Ïingmane bad ban nang pynkhlaiñ shuh shuh ïa ki na ka bynta ban wanrah ïa ka roi ka par bad ka jingkylla ha ka jylla.
Kiwei de kiba la ai jingkren ha kane ka sngi ki long ka kong S. Kharsahnoh, District School Education Officer (DSEO), South West Khasi Hills District, Mawkyrwat kaba la kren halor ka Midday Meal bad ka NEP 2020, ka kong Mary M. Rynjah, Programme Manager ka Meghalaya Early Childhood Development Mission & Rescue Mission kaba kren halor ka jingthmu jong ka Meghalaya Early Childhood Development Mission & Rescue Mission (MECDM&RM), u bah Eson Kharrymmai, District Mission Manager, NRLM, u Dr. G. Nongsiej na ka tnad ka koit ka khiah, u bah E Tariang, District Social Welfare Officer, South West Khasi Hills District.
Kiwei de kiba la ïadonlang ha kane ka sngi ki long, ka kong Laura Khongsit, ka kong Nauna Warjri kiba long ki Programme Manager ka Meghalaya Early Childhood Development Mission & Rescue Mission, u bah O. Lyngdoh bad u bah B. Pariat, kiba long ki Civil Engineers ka Meghalaya Early Childhood Development Mission & Rescue Mission, ki nongkitkam shnong, ki Self Help Groups na ki shnong bapher bapher bad kiwei de.
Kham ha shwa u bah S. Marweiñ, MCS, Block Development Officer (BDO) jong ka Ranikor C&RD Block u la ai ïa ki kyntien pdiang sngewbha bad u bah L.T. Tariang, MCS, Project Director ka DRDA, South West Khasi Hills District u la ai ïa ki kyntien khublei.