Kyntu ka Seng JYF ïa u CEM ban tuklar mardor halor ka bym ioh tulop ki nongtrei ka JHADC

Khliehriat naiwieng 10: Ka Jaiñtia Youth Federation (JYF) Central Body ka la phah da ka jingthoh sha u Chief Executive Member (CEM) ka JHADC ha kaba ka la kyntu ba u dei ban tuklar noh mardor ha kaba iadei bad ka jingbym ioh tulop jong ki nongtrei jong ka Council.
Ka Seng ha u kyrwoh lyngba u Bah O.B Nampui, Genl Secretary ka pynpaw bad ka seng lem bad ki nongshong shnong ka Jaiñtia Hills ki sngewkhia jur halor ka jingbym lah jong ka sorkar jylla ban weng ïa ki jingeh kaba ïadei bad ka jingbym lah ban siew ïa ka tulop kaba la neh shiphew bnai jong ki nongtrei ka JHADC kaba la ktah jur ia kiba bun ki nongtrei kumjuh ïa ka jingtreikam jong ka Council hi baroh kawei.
Ka jingpynthikna jong ka sorkar jylla ban pyllait noh ïa ka tulop kaba dang sahteng ka dei ka jingpulom na ka liang ka jong ka, kata da kaba pynpaw ruh ba ka sorkar ka la iai bteng ban shu kular thok na ka por sha ka por.
Nalor kata ka Seng JYF ka la ong ruh ba ki nongtrei ka JHADC da ka jingbym banse ki la hap ban shim da ka sienjam jong ka jingiakhih da kaba shong kyllain mungor ban pynpaw pyrshah ia kane ka jingleh bym suitniew jong ka sorkar jylla, hynrei ka long kaba sngewsih ban iohi ba ka sorkar kam shym la lah ban shim ia ki sienjam kiba lah ban weng noh ïa kane ka jingeh kat haduh mynta.
Kumta ha kaba ïadei bad kane ka phang, na ka liang ka Seng sa shisien pat ka kyrpad jur ia u CEM ka JHADC ba un shimkhia mador bad ban pynbor ïa ki bor ba dei khmih khnang ba yn lah ban pyllait noh mardor ïa ka tulop ba sahteng jong ki nongtrei.