Shillong, Naiwieng 10 : Ha kine ki khyndiat snem la ïohi shisha ïa ka jingkiew stet ki phlim Khasi la ka long ha ka rukom ring, ka rukom pynwandur bad ruh haduh ka rukom pynïaid ïew ïa ki.
Hynrei lah pat ban ong ba bun na kine ki phlim haduh mynta hi ki kut beit tang ha ki phlim jingieid, lane ka khana tang shaphang ka jingieid ki shi samla bad kham ñiar bad ki dang duna bha kiba shna ïa ki phlim kiba ïadei bad ka jingim, ka jingjia bad ka jinglong jingman kaba ïadei bad ka jingim kaba man ka sngi.
Lah ban ruh ban ong ba ka jingdon ki longkmie kiba mih lang sha ka rynsan shna phlim ka la pynpher khyndiat ïa ka rukom shna bad pynwandur ïa ka khana kaba ïadei bad ka jinglong jingman bad ki jingkynduh kiba lah ban jia lane ïa tyngkhuh ha ka jingim jongno re.
Kane ka longkmie kadei ka Kong Simi Khongtiang bad ka phlim ba ka pynmih ïa kaba la ai kyrteng da – Ka Chithi, kadei ka phlim kaba kham pher bad lehse ym pat ju don kiban poi pyrkhat ban shna ïa kum kitei ki jait phlim kiba don la ka jong ka khana kaba pynlong ïa ki paidbah ban kwah peit haduh kaba kut.
Ïa kane ka phlim la pyni sha ki paidbah (Special Screening) ha kane ka sngi Palei ha ka tamasa ki phlim ne ka Kelvin Cinema Festival 2023 kaba long ha Soso Tham Auditorium.
Khyndiat shaphang kane ka phlim – Kumba ju long ha bun ki longiing Khasi – Jaintia, ki kmie ki kpa ki don ka jingkitkhlieh ïa la ki khun hynrei don pat ki khun kumba jia ïa ka Lasubon (Asunta Papang) bapli ka la shu ngat ha ka jingjia kaba ktah syndon naduh ka bor met haduh ka bor pyrkhat tang na ka daw ka jingieid kaba pynkthang.
Kane ka jingjia ym tang ba ka pynbitar pyndom ïa ki kmie ki kpa (Bah Petros Rymbai bad Kong Some Mary Dkhar) hynrei ka la ktah ruh wat ïa ka jingïadei hapdeng ka khun bad ki kmie ki kpa.
Ka khana kam kut tang hangne, ka jingkha ïa i khun kynthei i Darika (Ekratia Khongtiang) hapdeng ki kynrum kynram kiba mih ka la dei sa kawei pat ka bynta kaban pynjaw ummat brup ïa ki paidbah ba wan ban peit ha katei ka janmiet.
Nalor kine, ka bynta ba shim da u Makhian Chandame (Elizer Bareh) kadei ka bynta pdeng jong ka kyrteng jong ka phlim namar dei ma u ba ïathuh khana ïa ka pyrsa shaphang ka jingïathoh shithi ka hynmen jong u (Lasubon) bad u kpa jong ka Darika.
Ka bynta kaba lai lehse lah ban ong ba kadei ka bynta kaba kham itynnad bad kham lung mynsiem ban ïohi ba i khun ba dang khie samla in mih na la iing ryngkat ka jingkhia ka mynsiem ban leit wad ïa ka daw tynrai kaba pynlong ïa ka kmie jongka ban im jynjar, khuslai naduh ba kha ïa ka haduh ba kan da heh.
Tangba khatduh hi, watla ka khana jong ka phlim ka long kaba pynkthang bad pynpang ïa ka mynsiem jong ki nongpeit hynrei ka don pat ïa ka khubor kaba sngewtynnad, ba ki kmie ki kpa long katba long kin mab ïa la ki khun watla don ka khep ba ki hap ban ai da ka jingsneng kaba tyngeh.
Lah ruh ban kynthoh khyndiat, lada ïa kane ka phlim la pynmih ha ka ktien Khasi kan kham khring bha ïa ki paidbah. Hynrei la katta ruh ka jingai ïa ki subtitles da ka English kan pynlong ïa ki briew na kiwei pat ki bynta jong ka Ri lane jong ka pyrthei ba kin sngewthuh bad peit lang ïa ka.
Ha kawei pat ka liang, dei ruh ban ai ka jingïaroh ïa ka rukom ring ïa ka phlim kaba pyni ba ki Khasi jongngi ki la tbit bha wat ha kaban ring bad shna phlim khamtam eh ban pyrshang bud wat ai ka rukom ring dur kumba leh ha ki phlim Bollywood. Ïa kane ka bynta ka jingïaroh kadei ruh ïa u nongring bad nongshna, u Kamki Diengdoh uba baroh ki tip ba udei uwei na ki nongring phlim uba la paw bha ha ka jaidbynriew Khasi – Jaiñtia.
