Lada ka sorkar kam lah ban buh briew kham bun ha khyrdop Infiltration, pyntip sha ka KSU ban ïarap, ong ki nongïalam

Nongpoh, Lber 14: Hadien ka jingioh bat jong ka seng Khasi Student Union ïa kumba 90 ngut ki bar jylla kiba khlem kot khlem sla bad kiba ioh rung lait lan sha ka jylla, ki nongïalam ka KSU hapoh ka jingïalam u Samla Lster Nongbet President ka Umsning Circle bad ki dkhot bad nongïalam ka Nongpoh Circle mynta ka sngi kila hiar sha Infiltration Check Gate ha Byrnihat naka bynta ban wad jingtip naki ophisar halor ka jinglaitlan ka rung ka mih ki bar jylla.
Kum ban shu pynpaw ba ki nongïalam ka KSU Umsning Circle haka 12 tarik kila ioh ban bat haduh 9 ngut ki bar jylla na ki 2 tylli ki bos kiba la rung beaiñ sha ka jylla khlem ki kot ki sla kiba biang, ha kaba kila kynnoh ruh ba ki hap ban siew 4 hajar tyngka ban lait na Infiltration Check Gate ha Byrnihat, kaba la pynlong ïaki dkhot ka KSU ban bitar, bad dei halor katei ka nongrim ba kila leit ban hiar mynta ka sngi ban ïakynduh bad ki ophisar ba dei peit.
Haba kren sha ki lad pathai khubor naka liang u Samla Lester Nongbet President ka Umsning Circle u la ong ba kum ka seng kala leit ban ïakynduh ïaki ophisar ba dei peit ïa katei ka Infiltration Gate ha Byrnihat ha kaba la lap ba ka daw hi ka dei ka jingdkoh ka sorkar jylla ba kam shym la pyntreikam ïaki aiñ ba teh pyrkhing ïaka rung ka mih ki bar jylla kiba wan trei bylla, naduh ka Inter-state Migrants Workmen (Regulations of Employment and Conditions of Service) Act 2011, ka Meghalaya Residents Safety and Security Act (MRSSA) ha kaba naka liang ki pulit Infiltration ki shu talasi tang ïaki EPIC bad ki Adhaar Card.
U la ong ruh ba wat ka Facilitation Center ne ka Entry point kaba la buh ha Umling kam shym la trei kam shuh haduh mynta hynrei katei kaba la shu long tang ka Screening Center ha kaba ïadei bad ka jingpang Covid-19 hynrei naduh bala kut katei ka khlam katei ka jaka kaba la shna kyrpang ha Umling ruh kala kylla ïingjah bad kam shym la treikam shuh.
Ka jingïai kuman jong ka sorkar jylla ban pyrkhing ka pynlong ruh ïa ki district ba marjan bad ka Assam ban jur ki jinglute, ki kam tuh kam thiem, ki kam dih bad khaïi drok bad bun ki runar ba thmu ba pynïap ïa ki mynsiem ba lui lui kumba ngi la sakhi ha kine ki sngi ki taiew ba mynta.
Shuh shuh ha katei ka jingleit kynduh jong ka seng ïaki ophisar ka tnad Infiltration la lap ruh ïaka jingduna jong ki briew kiba don ha katei ka jaka ba ki shem jingeh wat ban talasi ïaki mynder, bad kim don ruh wat ka kali ban beh lada don kiba phet na katei ka jaka bad katei baroh ka dei ka jingbym shimkhia jong ka sorkar jylla ban buh kham bun ki pulit bad ruh ki kali ban beh lada don kiba phet na katei ka jaka khnang ba ki mynder kiba thmu ban rung tuh kin nym ioh lad.
Shuh shuh naka liang ka seng ka phah ruh ka kyrwoh sha ka sorkar lada kam lah ban buh kham bun ki briew ha katei ka khyrdop ban talasi ïa kiba wan rung shaka jylla, ka sorkar ka dei ban pyntip sha ki dkhot ka KSU ban leh ïa kaba donkam, namar kum ki dkhot ka KSU ki kloi ban ïarap ïaka sorkar, la bynrap u samla Lester.