Nongpoh, Lber 14: Wat hadien 5 sngi ba uwei u rangbah naka shnong Pahammawleiñ 20 mer ha Ri-Bhoi u la shah pynïap dusmon haki runar bym lah ban ithuh da kaba lynthem maw haduh ban da ïap haka por ba u dang thmu ban leit sha lyngkha trei, ki pulit jong ka Ri-Bhoi haduh mynta kim pat lap ksai ïaki runar ba donkti.
Kum ban shu pynpaw ba utei u rangbah uba la tip kyrteng kum u Bah Elius Ryndong, u la mih na ïing ha ka por 7 baje ei ei haka step jong ka 9 tarik mynta u bnai, da ka jingthmu ban leit sha lyngkha, hynrei naduh katei hi ka por, kiba haïing kim don jingtip eiei ruh em, tad haduh ba ki la ïoh ïa ka khubor ba u la shah pynïap ha ki bynta ka lynti khlaw, kaba don harud jong ka surok na Pahammawlein 20mer sha ki thaiñ Umdap, ha kaba ki runar kila shu pynïap dusmon da kaba lynthem maw haduh ba ka khlieh utei u rangbah kala pra phom.
Naka liang u heh pulit jong ka Ri-Bhoi, u Giri Prasad u la ïathuh ba haduh mynta ki pulit kim pat lap ksai ha kaba ïadei bad katei ka jingjia, hynrei ki pulit kim shym la shongthaid ban pynlong ka jingtohkit naka bynta ban ioh kem ïaki runar ba donkti ha katei ka kam pynïap briew.
