Jowai, Lber 14: Ka Hynñiewtrep Border Disputed Redressal Forum (HBDRF) mynta ka sngi kala mih shakhmat ban pyrshah jur halor ka jingkam jong u Myntri Rangbah ka Assam ïa ka Shnong Mukroh kaba dang dei pura ka jaka ba hap hapoh ka West Jaiñtia Hills District.
Na ka liang u Chairman jong ka u ma Chandame Sungoh ha ka jingkren sha ki lad pathai khubor ula ong ka jingmih jong ki ha ryngkat ka jingdonlang ki dkhot ka Hynñiewtrep Women Welfare & Development & Organization bad ka Movement for Change ka long beit ban pyrshah ïa kane ka jingkam u CM ka u Himanta Biswa Sarma hapoh ka ïing Dordor ka Assam halor ka jingkylli uwei na ki MLA napoh ka Karbi Anglong uba pan jingtip ba ka shnong Mukroh ka dang hap hapoh Assam ne Meghlaya, hynrei la jubab da u Himanta khlem da pyrkhat sani bha uba la kam beit ba ka hap hapoh Assam.
Shuh shuh u ma Chandame ula ong kumba long kane ka jaka jong ka Shnong Mukroh ka dang hap shispah na shispah percent shapoh ka jylla Meghalaya, khlem da kdew ïa kita ki notification 1957, 1958 ter ter, hynrei katkum ka Notification ha u snem 1951 ka shnong Mukroh kala paw ba ka dang hap shapoh ka Meghalaya.
Ha kaba ïadei bad ka Block-1 u ma Sungoh ula pynsngew ba ka Block-1 ka hap naduh ki bynta jong ka Block-2 kiba ïaid katkum ka Notification 1951 ka jaka ka long naduh ka jingkahulu, kumba tuid ka wah umshunam (Source of Um-i River), ter ter sha umsati (opposite Tahpat) shaduh ka wah um Khyrmi.
Halor kane ula ong ‘kiba bun na ki nong Karbi kim tip ïa kine ki jaka khamtam ïa ka umsati bad ka Source of umkhyrmi dei na kata ka daw ki nong Karbi ki kdew shiphang shane shiphang satai bad wanrah shibun ki jingklumar’.
Kane ka jingkam u Himanta ka long kaba khlem nongrim bad kaba lah ruh ban wanrah ïa ka jingklumar jingmut ïa kiba bun ba lang khamtam kito kiba don ha ki jaka khappud, ong ma Sungoh. U ong ruh ba kane ka jingkam ka dang ai bor ïa ki briew jong ka Karbi ban wan pynthup ïa ki nongshong shnong ka Jylla kiba don ha khappud Block-1.
Ka seng (HBDRF) ka pyrshah jur ïa kane ka jingkam u Himanta Biswa Sarma bad la kyntu ïa ka sorkar jylla ba kan shimkhia ïa kane da kaba phah ïa ka jingthoh sha u Myntri Rangbah ka Assam ban pyntikna ba ka Mukroh ka dang hap hapoh ka jylla Meghalaya bad ka Block-1 ka dang don mynta hapdeng ka jingpynbeit pud ban ïoh pynphai biang ïa kane ka jaka shapoh Meghalaya.
