Jowai, Lber 14: Ka Khasi Student Union (KSU) West Jaiñtia Hills District Unit lyngba kane ka kyrwoh ka pynpaw ïa ka jingbym lah pdiang halor ka jingkam trai khlem nongrim jong u Myntri Rangbah ka jylla Assam, u Himanta Biswa Sarma ïa ka shnong Mukroh.
Katkum ka khubor na ki lad pathai khubor bapher bapher, ka seng ka ong ba u Dr. Himanta ula kamba ka Mukroh ka dei kaba hap hapoh ka District West Karbi Anglong, Assam hapoh ka Assembly Session jong ka Assam.
Halor kane ka KSU WJHDU ka pynshai ba ka Mukroh ka dei ka jaka kaba pura jong ka West Jaiñtia Hills District naduh ba la kha ïa ka jylla Meghalaya ha u snem 1972. Shuh shuh, ha kane ka shnong la shong la sah tang da ki Khasi-Pnar naduh mynkulong mynkumah bad ka hap ruh ha ki Elaka bad Hima ki Khasi-Pnar.
La ong ba u Dr. Himanta ula kynnoh ruh ba ki Assam Forest Protection Force bad ki Assam Police ki la ïa kynad bad ki nongtuh dieng hynrei ka jingshisha hi ka long ba ha ka riti ka dustur u Khasi ka khlaw ka dei jong ka shnong, ne ka raid ne ka Elaka kaba mut ka dei ka jong u paidbah ym jong kano kano ka sorkar.
Kumta ha manla ki khlaw ha ka Bri U Hynñiewtrep ki bym hap ha ki kyndon pyrkhing ‘Law Adong, Khloo Blai, ‘Law Shnong, ki nongshong shnong ki lah ban thoh dieng katkum ka jingdonkam ka jong ki. Kumjuh ruh ha Mukroh ki paidbah ki leit thoh dieng na ki khlaw jong ka shnong ban pyndonkam ïa ki, bad ka dei ka hok ka jong ki naduh ki por u mynbarim u mynbajah bad ki sorkar khamtam ki sorkar nongwei kim don hok ban kam trai ne tuklar ïa ka nongkynti ki Khasi-Pnar.
Shuh shuh ka sneg ka pynrem jur ïa kane ka jingkam u Myntri Rangbah ka Assam ka long kaba bakla shibun eh bad ka pynpaw ba u kwah kam ei ïa ka khlaw shnong ki nongshong shnong ka Mukroh bad kumjuh ruh ïa ka shnong Mukroh baroh kawei.
Halor kane ka seng ka kyntu ïa ki paidbah ka Mukroh ha ryngkat ki paidbah ka West Jaiñtia Hills lem bad ki paid ka Bri U Hynñiewtrep baroh kawei kin ym ailad da leilei ruh wat tang shi inshi ka jaka u Khasi kan syntuid sha Assam.
Ka seng ka kyntu ruh ïa ka sorkar Meghalaya ba ka dei ban leh eiei halor katei ka jingkam namar ka pyni ba wat hapdeng ka jingïapynbeit pud ki ar jylla, ka Assam im im peit peit ka ïai kam trai beit ïa ki shnong Khasi ha man la ki jaka ba don ha khappud. Pynkut ka kyrwoh na u samla Laitphar Syngkrem President bad u Leningrad Tariang General Secretary ka Khasi Students’ Union West Jaiñtia Hills District Unit.
