Shillong, Lber 14: Wat la ka jingpynieng jong ka tnat ba peit ïa ki kam jngohkai pyrthei jong ka sorkar pdeng ïa ka Institute of Hotel Manangement (IHM), Shillong na bynta ban ai jinghikai ïa ki samla ka jylla ha kaba ïadei bad ki lad sengkam sengjam na ka jingdon ki jaka jngohkai pyrthei ha ka jylla hynrei ka jingbym don ki nonghikai kiba pura bad ka jingbun than ki kam kiba thylli ha kane ka shlem ai jinghikai ka la pynartatien pynban la kane kan urlong ne em.
Kat kum ka RTI kaba u Bah Disparsing Rani u la ïoh na kane ka shlem ai jinghikai la lap ba ki sanctioned post na bynta kane ka shlem ai jinghikai ki don 30 tylli ba kynthup ïa Principal 1, Head of Department 1, Senior Lecturer 3, Asst Adminsitrative Officer 1, Lecturer 4, Assistance Lecturer 4, Teaching Associate 2, Office Superintendent 1, Accountant 1, PA to Principal 1, UDC 3, LDC 4, Foreman 1, Assistance Librarian 1, Driver bad Peon kawei kawei.
Haba kren sha ki lad pathai khubor u Bah Disparsig u ïathuh ba napdeng kitei ki post kiba la mang da ka sorkar pdeng na bynta kane ka shlem ai jinghikai kiba thylli ruh dei ki post kiba kham donkam bha na btnta ban pyntyllun ïa ka kam ai jinghikai.
“Kiba thylli ki post ha kane ka jaka pule ki long, Principal, Asst Adminsitrative Officer, Office Superintendent, Lecturer 1, Assistance Lecturer 2, Teaching Associate 2 bad ruh ka post LDC bad Foreman kawikawei kaba thylli,” la ïa jingtip ïa nga ha ka RTI.
U la ong ba kane ka jingbun ki post ka la pynartatien ba kane ka jingthylli ki kam nonghikai kan lah ban ai jingshakri kaba paka ïa ki samla kiba leit ban shah hikai ha kane ka shlem ai jinghikai.
