6.66 klur pynlut ka sorkar jylla ban siew bai lutksan sha kiba khlad Covid-19

Shillong, Lber 14: U Bah Disparsing Rani ha ka sngi nyngkong u la ïathuh ba kat kum ka jingwad jingtip jong u lyngba ka RTI la lap ba ka sorkar jylla lyngba ka tnat Revenue & Disaster Manangement ka la pynlut T. 6,66,00,000 klur ban siew kum ka bai lutksan kiba haïing jong kito kiba la khlad noh na ka daw ka jingpang Covid.
Haba kren bad ki lad pathai khubor u Bah Disparsing u la ïathuh ba wat la ka sorkar ka la pynlut ïa katei ka pisa kaba la palat ïa ka 6 klur ki don ki longïing kiba la ai jingujor sha u ba kim pat ïoh satia ïa kane ka song jingïarap na ka sorkar jylla.
“Kumba 10 ngut tang kiba la ai jingtip ïa nga halor ka jingbym pat ïoh pdiang jong ki ïa kato ka song jingïarap kaba 50,000 tyngka kaba la mang sha kiba haïing jong kito kiba khlad na ka daw ka jingpang Covid,” ong u Bah Disparsing.
U la ong ba lada don kino kino kiba ha ïing jong kiba la khlad noh kiba ym shym pat ïoh pdiang ïa kane ka song jingïarap ki lah ban pan ïa ka thup jong kito kiba la ïoh jingïarap na ka sorkar ban peit ïoh lehse ki la don kyrteng.
Shuh shuh u la ong ba ki don kiba ha ïing jong kine kiba la khlad kiba la leit mih sha ki tnad ba dei peit ïa kane hynrei la ai daw ba ka don ka jingdkhoh ha ki katto katne ki bynta ban pynpoi ïa kane ka song jingïarap.
“Phi la tip hi ba ka Delhivery system jong baroh ki tnad sorkar ka jylla ki long kiba da suki shisha shisha ban treikam lehse ka jingbym ïoh ïa kane ka song jingïarap ruh kan dei na akne ka daw,” ong u Bah Disparsing.
Lah ban kdew hangne ba kiba khlad na ka jingpang COVID kidei naduh u snem 2020 ha kaba u Dr. Sailo, u trai ka Bethany Hospital ula khlad nyngkong eh. Hynrei kiba bun kidei kiba kham bun kidei kiba khlad ha u snem 2021