Lada ka jingpynïoh District ka pynsniew ïa ka Mairang, wat kyrshan ïa nga : Bah Metbah

Shillong, Rymphang 08 : U kyrtong ka UDP na Mairang constituency, Bah Metbah Lyngdoh ba dei ruh u President ka party ha ka sngi Balang u la ong ba lada ki paidbah ki sngewsih halor ka jingwanrah distrik ha Mairang ki dei ban kyntait noh ïa u shi syndon ha kane ka elekshon kaban sa long shen ha ka 27tarik mynta u bnai.
Ïa kane, u Bah Metbah ba dei ruh ha kajuh ka por u Lamphang ka Iing Dorbar Thawaiñ ka jylla kadei ha ka General Meeting jong ka UDP Mairang circle kaba la pynlong ha Mairang ryngkat ka jingdonlang da ki hajar ngut ki paidbah.
U kyrtong haba kren ha katei ka jingïalang u la ong ba u kwah ban pynsngew sha ki paidbah halor ka jingmih ki jingkynthoh halor ka jingwanrah distrik ha katei ka thaiñ. Kumta, u ong ruh ba lada ka jingwanrah distrik jong u ka pynsniew ïa ka Mairang, ka la bha ba ki paidbah kin ym thep shuh ïa u.
Katei ka jingkren jong u, kadei halor ka jingmih ki jingkynthoh ha ka constituency kiba ong ba uno uno uba wanrah distrik ym ju jop shuh.
U Bah Metbah u la ong ruh ba wat hapdeng kiba bun ki jingkynthoh mynta ka dei sa ka rai jong u paidbah ban jubab halor ki kam kiba la pyndep kum u nongmihkhmat.
Ha kane ka sngi, ka la don ruh ka jingpdiang burom ïa ki nongïalam na kiwei ki party ba kynthup na ka Congress, PDF ba kynthup ïa u Counsellor Wahlang, ka Dr. Eureka Lyngdoh Mawnai, ka kong Madonna Langstieh bad ki nongkyrshan jong kine ki nongïalam.
Haba kren ha ka jingïalang, kine ki nongïalam kila pynpaw ba ka jingwan ban kyrshan noh ka jong ki ïa u Bah Metbah Lyngdoh ka long ba ki sngewnguh ïa ka jinglah u MLA ka Mairang ban pynïoh ïa ka District kaba thymmai kaba dei ka jingangnud kaba la slem bha jong ki paidbah ka constituency hi baroh kawei lem bad ki kam pynroi kiba la pynïoh hapoh ka Mairang Constituency.
Kane ka long katkum ka kyrwoh na ka tnad pathai khubor jong ka party.