Shillong, Rymphang, 08: Ki shipai BSF ha ka sngi Balang ki la ïoh kurup T. 55 hajar ki lut pisa thok jong ka ri India na khappud jong ka East Jaiñtia Hills.
Ha ka miet sngi Baar, ki shipai BSF jong ka 172 Battalion ki la lap ïa ki runar kiba dang thmu ban prong na Bangladesh sha India. Tang shu ïohi ïa ki shipai, ki runar ki la phet bak sha Bangladesh ban shim kabu ïa ka jingdum jong ka miet.
Ha ka jingkhynra ha kane ka jaka, ki shipai BSF ki la ïoh kurup ïa kawei ka pla kaba don 105 tylli ki lut pisa thok T.500 jong ka ri India.
Halor kane, ki shipai ki la mudui da ka ejahar ha Umkiang PS bad ïa ki lut pisa thok la aiti noh sha ki pulit.
Ïa kine ki pisa thok kiba stang, la shon ha ka ri Bangladesh da ka jingthmu ban pynphriang sha ri India.
