Kynnoh ka NPP ba thmu pyndonkam ka TMC da ka buit na WB ban jop election

0

Shillong, Rymphang 8: Ka National People’s Party (NPP) ka la kynnoh ba ka Trinamool Congress (TMC) ka la wanrah da ki buit na West Bengal ban jop ïa ka ilekshon ha Meghalaya da ka jingpynkulmar bad da ka jingpyntieng.
“Ha ka election kaba la long ha u snem ba la dep ha West Bengal ki don bun bha ki jingjia shah pyniap, ki jingiamynsaw bad ki jingthombor ha kylleng jong katei ka Jylla,” ong u Working President ka NPP Shillong City u bah Manroi Bha Kharpuri.
U la ong ba ka BJP kaba don ha ka liang pyrshah ha West Bengal, kumjuh ka seng Congress bad CPI(M) ki la ujor ruh sha ki bor ba dei khmih ban pynsangeh ïa ki jingkulmar, bad ka jingjia ha katei ka Jylla ka la pynlong ruh ia u Lat katei ka jylla ban tuklar ban iada bad pyllait na ki jingkulmar.“Kumba la jia ha West Bengal, I kumba ha Meghalaya ruh lah ban sakhi ïa kum kane kajuh ka jingkulmar ka bym pat ju ïohi satia,” ong une u nongialam ka NPP.
Katkum ka tyllong khubor la kynnoh ba ki nongkyrshan jong ka TMC ha ka miet sngi Ba-ar ki la thombor ïa ka kali jong u MDC ka NPP na Phulbari kaba la wanrah ïa ka jingkulmar haduh ba 9 ngut ki briew ki la mynsaw. La ïathuh ba katei ka huri hura ka la jia ha ka por ba don lang ruh u kyrtong ka TMC uba dei u MLA barim, u S G Esmatur Mominin.
Katkum ka kaiphoD ba la ïoh na u District Election Officer ka West Garo Hills , ha ka miet jong ka 7 tarik ka la mih ka jingkulmar hapdeng ar kynhun, kata ka kynhun ki nongkyrshan ka NPP bad ka kynhun ki nongkyrshan ka TMC ha ka shnong Charbatapara kaba dang hap hapoh ka Phulbari Assembly constituency. Ki briew ka TMC kiba don ha katei ka jaka ba ïakulmar ki long u S. G. E. Mominin uba dei u kyrtong bad u MLA barim, u Moni Mondol, u Bhuttu, katba napdeng ki briew ka NPP u Habibur Zaman uba dei u MDC u la don lang ha katei ka jaka.
Hadien ba ïoh jingtip ïa katei ka jingjia, ki pulit jong ka Phulbari PS ki la poi sha katei ka jaka ban tem ïa ka jingïakynad, ha kaba la pynkit ruh ïa 9 ngut ki briew ba la mynsaw malu mala sha Phulbari CHC, kiba la lait noh hadien ba la dep ekamin, katba uwei u briew uba la tip kyrteng da u Nojrul Hoque la phah sha ka jaka sumar ba kham bha namar u la mynsaw na ki bynta jong ka khmat.Halor katei ka jingjia na ka liang u Nozim Hussain u la ujor da ka ejahar ha kaba u la kynnoh ba shi kynhun ki briew ba la ialam da Habibur Zaman jong ka NPP ki la sangeh hajan ka ïing ba u sah bad ki la kawang maw sha ka ïing, bad na katei ka jingther maw 4 ngut ki briew ki la mynsaw. La ïathuh ba ka daw jong katei ka jingkulmar ka dei hadien ba katto katne ngut ki nongkyrshan ka TMC ki la tied ïa ka Scorpio jong ka kynhun ba ïalam da u Habibur Zaman kiba la ïaid na katei ka jaka.

Leave A Reply

Your email address will not be published.