Ka jingïakhun kam long tang ïa u kyrtong ka NPP hynrei pyrshah ïa u MR bad SMR ruh : P.T Sawkmie

Shillong, Rymphang 8 : U Bah PT Sawkmie kyrtong ka United Democratic Party (UDP) na Mawlai hynne ka sngi Balang u la ong ba ka jingïakhun ka jong u ha kane ka kynti kam dei tang ïa u kyrtong ka NPP u bah Teiborlang Pathaw hynrei pyrshah ruh ïa u Conrad Sangma u Myntri Rangbah (MR) ka jylla bad u Symbud Myntri Rangbah (SMR)u bah Prestone Tynsong.
ïa kane u Bah Sawkmie u la kren ha ka jingïalang ba la pynlong da ka UDP Mawlai Circle ha phyllaw jong ka Indoor Sports Hall, Mawlai Nongpdeng hadien ba la dep ka jingïaid paidbah da ki ar shaka bad saw shaka kum shi bynta jong ka jingleh kmen, hadien ba u kyrtong ka UDP u la dep pyndep ïa ka scrutiny jong u ha kane ka sngi.
Na ka liang u Bah Sawkmie u la pynpaw ba ha ki bnai ba la leit u kyrtong ka NPP u la wan ïalam sha ka thaiñ Mawlai ïa u Myntri rangbah ka jylla u Conrad Sangma bad ïa u Symbud Myntri Rangbah bah Prestone Tynsong, ban ai skhim ïa ka Mawlai na kawei ka por sha kawei pat.
Hadien ka jingwan jong kitei ki heh sha Mawlai, ka UDP Mawlai, ki longkmie, ki samla, ki paidbah jong ka Mawlai constituency ki la ong ba kin shim ba kane ka dei ka jingtynjuh ïa ki, ba ki dei ban pynrem ïa u kyrtong ka NPP ka ban long ka dak ba ki pynrem ïa u myntri rangbah ka jylla bad ïa u symbud myntri rangbah ha kane ka kynti kaba mynta.
Nalor kata u la kyrpad ruh ïa ki paidbah ka Mawlai constituency ba kin dang ai ka jingkyrshan kaba pura ïa u namar u dei u briew u bym pat don ha ki jingïaleh mukotduma, ym kum u bah Pathaw uba la don ha ka jingïaleh mukotduma. U la kynnoh baka mukotduma kaba u kyrtong ka NPP u don ruh ka dei ka mukotduma 420, ïa kaba u la bam ïa ki pisa jong ki duk ki suk, kata lyngba ka Employment Provident Fund (EPF), kaba dei ka pisa ki nongtrei.
U pynpaw ba ïa kane ym dei ba ong u bah PT Sawkmie, hynrei dei ki kot khubor namar ka la mih ha ki kot ki khubor halor ka jingdon mukotduma jong u kyrtong ka NPP. U la ong ba u la bam ïa ka pisa ki paidbah bad kan long kaba sngewphylla kumno ki paidbah kin jied ïa u briew ba la thohbria.
Ha kane ka sngi la ïoh ruh ïa ka jingkren na u Bah KS Nongdhar, dkhot ka UDP ha Mawlai u la ong ba kane ka jingïaid lynti jong ki kan pynpaw sha ka pyrthei ba kin jied ïa u briew ba trei bad uba dei na ka party riewlum.
Shuh shuh u la ong ba ha kine ki sngi haba ïaid sharum shaneng la ïohi ba ki don ki riew rangbah kiba kren tang na ka bynta ka jingmyntoi shimet ka jong ki, bad ki kloi ban kyrshan ïa kawei pat ka party bad ban leh klet ïa la u jong u para doh parasnam.
Ha kajuh ka por u Bah PT Sawkmie u khot u wer ïa kiba la leit kyrshan ïa u kyrtong ka NPP ba kin phaidien bad ban wan ban ïatreilang noh bad ki ban pynjop don burom ïa u kum u kyrtong ka UDP.
Ha kane ka sngi la ïoh ruh ka jingkren na u bah Homer Kharkongor, president ka UDP Mawlai ba pynïaid ïa ka jingïalang, u bah Wanseng Jyrwa, working president ka UDP Mawlai, bah P Jyrwa bad kiwei kiwei.
Haba kut ka jingïalang u bah PT Sawkmie bad ki hajar ngut ki nongkyrshan ki la ïashim bynta lang ha ka jingshad da kaba tem da ka jingrwai jong ka Bom kaba dei ka shap jong ka UDP.