ïa kulmar ki nongkyrshan ka NPP bad ki nongkyrshan ka TMC ha Charbatapara, shah kem 16 ngut

Shillong, Rymphang, 08: U Chief Electoral Officer (CEO) ka Jylla u Bah F.R. Kharkongor ha ka sngi Balang u la pyntip ba la register case pyrshah ïa kiba donkti ha ka jingïahuri hura ha ka shnong Charbatapara, kaba hap hapoh ka Phulbari Constituency hapdeng ki nongkyrshan ka TMC bad ka NPP bad ka jingtohkit jong ki Pulit ka dang ïaid shakhmat.
U la kular ruh ba ki bor pynïaid elekshon jong ka District ki la kem ïa ki briew kiba donkti ha kane ka jingjia.
“Na ki 131 ngut ki briew kiba la shah kynnoh donkti, 125 ngut ki la shah rah ha ki Pulit bad kat haduh ba thoh ïa ka khubor 16 ngut la kem noh da ki pulit khnang ban pynthikna ba kin ym don shuh kino kino ki jingjia nangne shakhmat,” la ïathuh u Bah Kharkongor.
Shuh shuh u la ïathuh ba la bthah ïa u SDO (C) bad ïa u SDPO ka Dadenggre Subdivision ban leit tohkit ïa ka jaka ba la jia ka jingïahuri hura. Kin sa pynlong ruh ka jingïaid flagmard ha Phulbari Constituency ban pyni ïa ka bor jong ka aiñ.
“Baroh ki nongthaw jingkulmar kin hap ban soi ïa ka soskular ba kin long kiba jaijai. Ki bor synshar kin peitngor bha ïa ka jinglong jingman nangne shakhmat,” u la ong.
Ha ka miet sngi Baar, uwei u nongkyrshan ka All India Trinamool Congress (AITC) u la mynsaw jur hadien ba u la shah thombor ha ki nongkyrshan jong ka National People’s Party (NPP) ha Charbatapara kaba hap hapoh ka Phulbari Constituency ha West Garo Hills District.
Kane ka la jia ha ka por 10.30 baje mynmiet ha ing sah jong u Nozrul Hoque ha kaba ki nongkyrshan jong ka NPP ki la pynjulor ïa ki miej ki shuki ha ka jingïalang ba la pynlong da ka TMC.
Shuh shuh ka khubor ba la ïathuh da u Hoque ka ong, “Ki (NPP) la wan shikynhun bad ki la pyrshang ban thombor bad ban pynjot ïa ki jingdon jingem jong nga, ki la pynpra ïa ka kynroh siej, ïa ki miej, ïa ki shuki da kaba bom da ki dieng bad kawang da ki maw. Ki la kawang ruh da ki maw bad mawit.”
Shuh shuh u la kynnoh ba u MDC jong ka Shyamnagar u Habibuz Zaman ïa uba ju khot sin u Kasa u la ieng hajan ka iing jong u katba ki nongbud jong u ki dang shah kawang maw ha kaba saw ngut ki dkhot ka TMC ki la mynsaw.
Ïa mynta u Hoque u dang don hapdeng ka jingshah sumar ha Phulbari CHC.
Halor kane ka jingjia, u Nozim Hussain uba sah ha Charbatapara, u la ïathuh ba ka proseshon ba la ïalam da u Habibuz Zaman ka la sangeh hajan iing jong u bad ki la sdang ban kawang da ki maw ïa ka ing sah jong u ha kaba saw ngut ki briew ki la mynsaw.
Katkum ka kaiphod jong u DEO, ka daw kaba la pynmih ïa kane ka jingïahuri hura ka long katba u Zaman bad ki nongbud jong u katba ki dang ïaid lyngba na kane ka shnong, katto katne ngut ki nongkyrshan ka TMC ki la tynrah ïa ka kali Scorpio kaba ki shong kat haduh ba ka la mih ka jingïapyni bor paramet.
Na ka iïang jong ka TMC ha u kyrwoh ka la pynrem jur halor kane ka jingjia.
Katba na ka liang ka NPP pat ka kynnoh ba ka daw jong katei ka jingkulmar ka dei hadien ba katto katne ngut ki nongkyrshan ka TMC ki la tied ïa ka Scorpio jong ka kynhun ba ïalam da u Habibur Zaman kiba la ïaid na katei ka jaka.