Shah kyntait saw ngut ki kyrtong pynap, lai ngut ki shynrang bad iwei i kynthei na rilum Jaiñtia
Kut ka jingbishar ïa ki kot ki sla jong ki kyrtong
Shillong, Rymphang 08 : Ha ka jingbishar ïa ki kot ki sla jong ki 379 ngut ki kyrtong kiba thep kyrteng na ka bynta ban aireng ha kane ka elekshon MLA kaban sa long shen ha ka 27tarik mynta u bnai ha baroh 60 tylli ki constituency, ka tnad Elekshon hynne ka sngi Balang ka la kyntait noh haduh saw tylli ki kyrteng jong ki kyrtong hadien ba la lap ba ki dei tang ki kyrtong pynap (dummy candidate).
Katkum ka kyrwoh na u Chief Electoral Officer, Bah FR Kharkongor, kitei ki saw ngut ki kynthup ïa ki lai ngut ki East Jaiñtia Hills bad uwei na West Jaiñtia Hills. La pyntip ruh ba kitei ki kyrtong kiba shah kyntait ki kynthup ïa ki lai ngut na NPP bad uwei na ka UDP. Kitei ki kynthup ïa u Bah Ailad Bhoi na Jowai constituency uba thep kyrteng na ka NPP. Katba lai ngut kiwei pat ki kynthup ïa u Bah Hambertus Nongtdu uba thep kyrteng kum u kyrtong ka NPP na Sutnga Saipung.
Na Khliehriat constituency pat ki don arngut ba kynthup ïa ka Kong Violet Lyngdoh na ka NPP bad u Bah Stonely Shylla na ka UDP.
Kumta ha kaba kut, na ki 379 ngut ki kyrtong kiba la biang lut ki kot ki sla ki don 375 ngut ba kynthup ïa ki 339 ngut ki shynrang bad 36 ngut ki kynthei.
Na baroh ki distrik, ka East Khasi Hills kadei kaba don bun tam ki kyrtong kata haduh 116 ngut kynthup ïa ki 102 ngut ki shynrang bad 14 ngut ki kynthei. Hadien kane pat la bud sa ka West Garo Hills 69 ngut kata 65 ki shynrang bad saw ngut ki kynthei. Ha Ri Bhoi pat ki don baroh 35 ngut, kata 28 ngut ki shynrang bad 7 ngut ki kynthei.
Ha West Jaintia Hills ki don 26 ngut bad baroh ki dei ki kyrtong shynrang suda, ha North Garo Hills ki don 24 ngut bad baroh ki dei ki shynrang, ha West Khasi Hills ruh ki don 21 ngut bad baroh ki dei ki kyrtong shynrang.
Ki distrik ba don duna eh ki kyrtong dei ka Easten West Khasi Hills kaba don tang 9 ngut ki kyrtong kata 7 ki shynrang bad ar ngut ki kynthei bud sa ka East Jaintia Hills kaba don 10 ngut ki kyrtong kata 8ngut ki shynrang bad arngut ki kynthei.
Ha South West Khasi Hills ruh ki don 16 ngut ki kyrtong kynthup ïa ki 14 ngut ki shynrang bad arngut ki kynthei, ha East Garo Hills ki don 18 ngut kynthup 16ngut ki shynrang bad 2 ngut ki kynthei, South West Garo Hills 15 ngut ba kynthup ïa ki 12ngut ki shynrang bad 3 ngut ki kynthei katba ha South Garo Hills pat ki don 16ngut bad baroh ki dei ki kyrtong shynrang.