Lada don kiba wan jrong thylliej kiba ong ban kren ïa ki mad jong ka jaitbynriew ha Delhi

Shillong, Nailar 31: U State President ka National People Party (NPP) uba dei ruh u Symbud Myntri Rangbah u Bah Prestone Tynsong u la pynpaw ba ka Mawkynrew Constituency kan sa tuid ki kam pynroi ha kiba bun ki liang khamtam eh ha ka liang ka surok bad ka kam jngohkai pyrthei.
Ïa kane u Bah Prestone u la kren ha ka jingleit ïalap election na ka bynta u kyrtong ka party NPP na ka bynta ka MP election shiteng samoi, ha ka jingialang kaba la pynlong ha shnong Jongksha mynta ka sngi Nyngkong.
Ha kane ka sngi da ki hajar ngut ki paidbah kila tuid sha katei ka jingialang ban sakhi hi dala ki jong ki khmat bad ruh ban ithuh ïa u kyrtong jong ka party NPP.
Haba kren u Bah Prestone u la ong, Ha kaba iadei bad ka Mawkynrew Constituency nga iohi shisha ïa ka jingkylla naduh u 2018 haduh kine ki sngi kiba mynta, ki scheme lyngba ki snem kiba la leit noh ngim ju kham iohi kham ioh sngew, hynrei ha ka por jong u Bah Paidang ngi iohi ïa ki sakhi satar ba ki ïeng ha khmat jong ngi.
Shuh shuh u la ong, Ngi la sdang ban pynbit pynbiang ïa ki tourist spot namar ba hangne ha Mawkynrew Constituency ha kine ki khyndiat snem ki ban wan kan long kumjuh kum ka Sohra, Mawlyngnong bad ka Shnongpdeng.
“Pynkhreh lypa ïa kane ka lah don ka scheme kaba lah pynbeit kawei ka Tourism Circuit ha kaba kane ka shnong Jongkhsa bad ka Umkoi yn sa sdang ban trei noh kaba ar pat lah jan dep ka survey surok najan Smit haduh ha Mawkynrew ban shna pynheh ïa ka surok” ong u Bah Prestone..
Shuh shuh u la ong, “Ngi kwah ban pynlong da ka intermediate lane bad ngin ai ïa kane ka surok jong phi kaba bit kaba biang naduh na Smit haduh ha Mawkynrew ha kaba kiba wan na kylleng sawdong jong ka ri India bad ki ri jong ka pyrthei kin iaid lyngba kine ki shnong ki jong phi kaba surok rong kaba long kum sha phareng bad ka surok rong kaba tip top”.
“Nga kwah ban kyntu ïa ki nongsynshar shnong bad ïa ki paidbah ba kidei ban ïa trei lang bad u MLA jong phi ïa trei lang bad ngi ka sorkar khnang ba kin ïaid beit kine ki kam kiba ngi buh ha khmat” u la ong.
U Bah Prestone u la ong, Lada phi pynjop ïa u Dr Nonglait phin sa ïoh ïa ka triple engine (lai tylli ki engine) kaba mut ka engine ba nyngkong dei na u Bah Paidang,kaba ar dei ka sorkar bad kaba lai yn dei u Dr Nonglait lada phi pynjop.
“Lada phi jied ïa kiwei ki party kin lynti ha Delhi, hynrei lada phi ai ka jingjop ïa I Dr Nonglait kan pynmyntoi ïa ngi ka party NPP kaba ïalam ïa ka sorkar bad ngim donkam shuh ban pynlut por sha Delhi namar bal ah don lypa u MP jong ngi”.
Lada dei ki mat ki ban ïa kren hapoh ka dorbar bah hapoh Parliament un kren une u rangbah bad lada dei ban kren ha Rajya Sabha ngi lah don u MP jong ka NPP bad uta u dei u James K Sangma, u la ong
Shuh shuh u la ong, “Lada don mano mano ba wan jrong thylliej hangne kiba wan ong kein noh ïa ka NPP bad jied beit ïa ngi namar ngin ïa kren halor ka jaitbynriew hangtei ha Delhi, ngan ong ïa phi tang ban ïa kren ruh ym pei namar ba tang shi lain ruh ym nang”.