Lada biang ka pla tyngka ka Sorkar ka lah ban pynurlong ïa ki jingangnud ki Nonghikai: Rakkam

Shillong, Risaw 28: U Myntri ka Tnad Pule Puthi Rakkam A Sangma ula ong ba ka jingpyrshang ban pynurlong ïa ki jingangnud jong ki Nonghikai ha ki kyrdan bapher bapher, kan shong eh ha ka pla tyngka jong ka Sorkar Jylla namar lada biang ka pla tyngka ka sorkar ka kloi ban pyntreikam ïa ki jingangnud jongki.
Haba ïakren bad ki nongthoh khubor, u Myntri ula ong ba ka Meghalaya ka don kumba 55000 ngut ki nonghikai bad man ki nonghikai jong ki kyrdan bapher bapher, ki don ïa la ki jong ki jingdawa ba kynthup ïa ka jingthungkam pura noh, ka dfficit pattern, adhoc grant bad provincialisation.
“Hooid, ka Sorkar bad nga ruh nga kwah ban pynurlong ïa ka jingangnud jong man ki nonghikai hynrei namar ba ka Sorkar ka don duna ïa ki lad pynmih pisa, kumta kan shong eh haka jingdon pisa jong ka Sorkar” ula ong haba bynrap “Ngi don eh ïa ka mon hynrei ngi don ruh ïa ki jingeh hakhmat jong ngi namar ka jingduna pisa”.
U Myntri ula kynthoh ïa kane halor ka rai ba dang shen ong ka Federation of All School Teachers of Meghalaya (FASTOM) ba buh por ïa ka Sorkar Jylla ba kan pynurlong noh ïa ki jingdawa ha ka ban kyntiew kyrdan ïa baroh ki skul Adhoc sha ki Dificit system hapoh ka 30 tarik Iaiong, 2024.
Haba pynpaw ba ki Nonghikai ki don ha ka thup treikam ba hakhmat eh jong kane ka Sorkar ba mynta, u Rakkam ula ong “Ngi la pyrshang kat kaba lah ban leh ha ka ban ïarap ïa ki nonghikai jong ngi”.
“(Hynrei), lada ngi lah ban pyntreikam ïa ka jingdawa jong kiwei ki nonghikai, kiwei pat kin wan ban tynruh bad dei namar kane ngi hap ban shim khia lang ïa baroh”.
Ula ong ba ki Nonghikai SSA ki la dawa ban thungkam pura noh ïa ki katba ki nonghikai Adhoc kila dawa ïa ka difcit pattern bad ki nonghikai deficit pat ban provincialization ïa ka kam jong ki.
Halor ka jingkylli, u Myntri ula ong ba kan dei ka jingkit kaba radbah ïa ka Sorkar Jylla lada ka dei ban pyntreikam ïa baroh ki jingdawa jong ki Nonghikai.
“Hynrei kam mut pat ba ka Sorkar ka ong ‘Em’ hynrei ha kine ki san snem, ka Sorkar ka la kyntiew ïa ka adhoc grant jong ki nonghikai ha ka secondary level bad ngi la kyntiew arshah ïa ka tulop ki nonghikai skul pre primary bad ki cook cum helper. Ngin dang ïai bteng ban leh ïa kane namar ki nonghikai ki dei kiba ngi la shim khia hakhmat eh” ula kular.