Ban kyntiew ïa ka kam jngoh kai ha kane ka thaiñ Shatei Lammihngi pynlong tamasa ha Vietnam

Shillong, Risaw 29: Ka 3rd North East India Festival, ka la sdang ha ka sngi Thohdieng ha Ho Chi Minh City, Vietnam bad ka thong jong kane ka tamasa ha Vietnam ka dei na ka bynta ban kyntiew ïa ka kam jngohkai pyrthei ha kane ka thaiñ Shatei Lam Mihngi ka ri India.
Kumba 52 tylli ki Tour Operator na Vietnam bad 20 tylli na ka thaiñ Shatei Lam Mihngi ki la ïa shong jingïalang ha kaba ïadei bad ka kam jngohkai ha ka North East India Festival kaba la long Ho Chi Minh City.
Ha ka sngi ka baar, jong katei ka prokram la sakhi ba ki riew pawkhmat na ka ri India bad Vietnam, kiba kynthup ïa ki Myntri Rangbah ka jylla, ki Myntri ka sorkar pdeng, ki riewshimet kiba pawnam ha ka khaïi pateng, kila ïashim bynta ha ka jingïaphylliew jingmut ha kaba ïadei bad ka pule puthi, khaïi pateng bad ka jingpynsngewthuh ha kaba ïadei bad ka kolshor.
U Anil Oraw, Regional Director jongka Ministry of Tourism, ka sorkar India, haba kren ha ka jingïalang ula ban jur ïa ka jingdonkam ban kyntiew mar kylliang ha ka kam jngohkai bad ka khaïi pateng.
“Ngi thmu ban wanrah ïa ki Vietnamese Tour Operators sha ki bynta jong ka ri India. Kane ka jingkyntiew mar kylliang kan pynriew spah ha ka ban sngewthuh kham bha ïa ka kolshor bad kumjuh ïa ka kam jngohkai bad ïa ka khaïi pateng” ong u Anil.
Katba u Sandeep Arya, uba long u nongkit tiensyiem ka ri India sha Vietnam ula ban jur ïa ka jingdonkam ban pynïasoh kaba kham bha, ka khaïi pateng bad ka kam jngohkai hapdeng ka Vietnam bad ki jylla ka thaiñ shatei lam mihngi bad ban kyrshan ïa ka jingher ki liengsuiñ na Guwahati sha Hanoi bad HMCC.
U Dinh Vinh Cuong, Director jongka Vietnam International Entrepreneurs Networking Club ula ong, “Ngi dang ïaphylliew jingmut ban sdang noh ïa ka jingpynher ïa ka liengsuiñ na Vietnam sha ki jylla ka thaiñ shatei lam mihngi. Nga la don ka jingïakren kaba seisoh bad u Shyamkanu Mahanta bad nga sngewtynnad ban pyntip ba ngan sa ïalam ïa ka kynhun kaba kynthup ïa ki 22 ngut ki nongbei tyngka ban wad ïa ki lad ki lynti ban ïatreilang bad ki jylla ka thañ shatei lam mihngi ha ki bnai ban wan”.
U Shyamkanu Mahanta, Chief Organiser jongka North East India Festival, ula ong, “Ka jingïoh jingtip haduh mynta ka long kaba biang bha. Ha ka sngi sdang la sakhi ïa ka jingwan ïashim bynta ki nongïalam na ki Province ki bapher bapher jong ka Vietnam ban ïashim bynta ha ki jingïatai kiba seisoh. Ka jingïatai mynta ka sngi halor ka khaïi pateng bad ka kam jngohkai bad ki kompani na Vietnam, kaba la btin lynti da ka DoNER Ministry India and Invest India, ka long kaei kaei kaba seisoh bha. Nga dap da ka jingkmen ba ka thaiñ shatei lam mihngi ka la lam ïa ka lynti ha ka ban pyninam ïa ka Vietnam kum ka thong bad ban pynwan dur ïa ka Act East policy jong u Myntri Rangbah duh ka ri u Narendra Modi. Ngi kyrmen skhem ba kane ka jingthmu yn tang ban wanrah ïa ka jingïadei kaba don jingmut hapdeng ki ri hynrei ban pynmih ruh ïa ki buit treikam ha kaba ïadei bad ka pule puthi, kolshor bad ka khaïi pateng. Ngi pynpaw ka jingsngewnguh kaba khraw ïa baroh kiba don bynta na ka ri Vietnam bad ki nongmihkhmat na ka ri India.”
Na ka liang u Madan Mohan Sethi, Consul General of India ha HCMC, ula ong, “Ka thaiñ shatei lam mihngi ka long kum ka jingkieng jong ka kolshor bad ka ïoh ka kot hapdeng ki ri. Ka long kaba sngewkmen ban sakhi ïa ka mynsiem jong ka jingïatreilang bad ka jingpashat jingmut lyngba katei ka festival.”